Home Notisia Enkontru Dahuluk Conselho Dezenvolvimentu Juventude, Planu Asaun Nasional mak Prioridade

Enkontru Dahuluk Conselho Dezenvolvimentu Juventude, Planu Asaun Nasional mak Prioridade

383
0
Enkontru Conselho Nasional Dezenvolvimentu Juventude ba dahuluk, iha SEJD, 20/10 (Foto: Frans JDA)

Reportajen Francisco JDA

Iha abertura enkontru dahuluk ba Conselho Nasional Dezenvolvimentu Juventude (CNDJ), Sekretariu Estadu Juventude Desportu (SEJD), Abrao Nokosiku Saldanha, nudar mos Presidente ba CNDJ, husu atu CNDJ koordena no diriji servisu sira liga ho deenvolvimentu juventude.

“Asuntu juventude ne’e asuntu transversal. Tan ne’e CNDJ ne’e reuni esforsu hodi koordena no diriji servisu sira mak relasiona ho dezenvolvimentu juventude. CNJD mos sei aprova Planu Asaun Nasional hodi implementa iha kada ministeriu,” Abrao Nokosiku esplika iha ninia intervensaun, iha Salaun Enkontru SEJD, 20/10.

Orgaun Conselho Nasional Desenvolvimentu Juventude (CNDJ), kria hosi Dekretu Lei 32/2017 hanesan órgaun Konselho Primeiru Ministru nian. Orgaun ne’e  atu tau matan ba area juventude sira, liuliu ba investimentu no planeamentu ba area juventude nian.

Liu hosi intervista ho Neon Metin, Sekretariu Estadu Juventude Desportu ( SEJD),  Abrao “Nokosiku” hateten katak enkontru ne’e reúne hosi ministériu hotu atu hahu servisu ba juventuide sira  no hare ba planu programa ministériu nian.

“Conselho Dezenvolvimentu Juventude ne’e mak sei haree kona ba Planu Asaun Nasional de Juventude. Planu ida ne’e laos SEJD deit mak implementa maibe ministériu hotu ho organizasaun sira seluk, ne’ebe hanesan parseiru. Sei iha planu ida únika no integradu ba joven sira. Konselho ohin ne’e atu hahú servisu ba ida ne’e hodi estabelese planu ida ne’e”, hateten Sekretaru Estadu Abrao “Nokosiku”.

Sekretario Estadu Abrao esplika mos katak orsamentu ba juventiude iha SEJD tau iha programa lubuk ida mak hanesan programa kriatividade juvenile, intensiva atividade joven sira nian iha nivel suku no maximisaun centro formasaun ba joven sira iha area protesaun ambientál, produsaun ekonómika no manutensaun paz, iha arte marsiais. Orsamentu ne’e fahe tuir programa sira ne’e. Planu asaun ho atividade hamutuk 57  ne’ebe finansia ho osan $9.8 millhoens hosi SEJD.

Iha fatin hanesan Diretora Diresaun Nasional Rekursu Humanu Ministeriu Saude, Tomasia de Sousa iha intervensaun hateten Ministeriu Saúde hare katak ho konselho ida ne’e, bele mos fo forsa ba ministériu hotu, oinsá ida-idak trasa sira nia planu, hodi hatán ba nesesidade juventude sira.

“Iha Ministeriu Saude nian, hau hanoin katak area importante ida mak hahú prevensaun no edukasaun ba juventude sira iha area saúde. Ministériu Saúde iha nia polítika ida oinsá atu forma juventude iha area saúde nian, atu foinsa’e sira labele moras, oinsá sira proteje sira nia an hosi moras. Ida ne’e mak Ministériu Saúde define ona nia polítika iha planu estratéjia 2011-2030”, hatete Diretora DNRH, Tomasia de Sousa.

Tomasia de Sousa reforsa tan, Ministériu Saúde em prinsípiu konkorda tebes konselho ida ne’e, atu fo forsa no tulun ba ministériu hotu, tau planu nune’e oinsá atu eleva juventude sira iha Timor-Leste.

Baze legal ba establesementu CNDJ ne’e mak Konstituisaun RDTL, artigu 19,  Planu Estratéjiku Dezenvolvimentu (2011-2030),  no Politika Nasional Juventude. Tuir Politika Nasional Juventude CNDJ mak órgaun ida hodi fo  akonsellamentu no koordenasaun ho instituisaun públika sira seluk no privadu ne’ebé maka partisipa atividade sira iha área dezemvolvimentu juventude no assume forma konabá reuniaun periódika sira. Orgaun ne’e konvokadu hosi Primeiru Ministru ka membru Governu responsável ba área juventude.

Print Friendly, PDF & Email

LEAVE A REPLY

Please enter your comment!
Please enter your name here