Home Notisia MAPKOMS: Garantia Governu Sei La Ataka Media, Gill: Lia Los Ema Labele...

MAPKOMS: Garantia Governu Sei La Ataka Media, Gill: Lia Los Ema Labele Hakoi

401
0
Foto liman karuk MAPKOMS, Francisco Jeronimo no foto liman los Prezidente KI,Virgilio Guterres. [Foto: Franscisco JDA | 16.10.2020]

Reportazen Francisco JDA

Forsa polítika no militár ne’ebe sira hanoin katak ho oho jornalista sira bele taka lia los, tinan 45 liu prova katak lialos ne’e ema labele hakoi, ema bele hakoi jornalista nia isin mate, maibé lia los ne’e la bele hakoi“. Prezidente KI

Jornalista nia papel hahu hosi tinan 45 liu ba, ne’ebe jornalista nain lima, konnesidu ho naran Balibo Five no jornalista rai laran sira seluk ne’ebe mak hatudu mos sira nia papel importante iha tempu pasadu, kontribui ona ba luta ukun rasik an, hosi ukun kolonializmu.

Liu hosi komemorasaun loron Balibo Five ba dala 45, liu hosi diskusaun ho tema Papel Media iha Konstrusaun Estadu, liu hosi diskusaun ne’ebe organiza hosi Konsellu Imprensa (KI) no Centro Nasional Chega! (CNC), Ministru Asuntu Parlamentar no Komunikasaun Sosial (MAPKOMS), Francisco Jeronimo hateten katak ohin loron tempu liberdade no ukun an, katak mídia ho liberdade imprensa ho liberdade espresaun ne’e sai importante xave ba Timor-Leste.

“Ema hotu rekoinese katak, too oras ne’e seidauk iha presaun ruma ba iha media no jornalista sira, katak labele existe ou labele halo kobertura oinoin, hanesan ema iha balun senti la dun kontenti maibé ema umanu, iha regra, komunga saida mak ita hotu nia hakarak mak espresaun ne’e livre.  Liberdade iha atu halao ninia atividade, governu asegura nafatin, governu mos sei la  impoin katak hotuhotu tenki lao tuir saida mak governu nian”,dehan Ministru Francisco, iha Balibo, 16/10.

Nia informa katak jornalista ohin loron, laos hanoin ona atu buka fali apoio, para atu hetan liberdade foun, maibé halo oinsá mak hamutuk ho governu no estadu, atu hatoo informasaun ba ita nia komunidade, eduka sira oinsá mak moris iha demokrasia no estadu direitu demokrátiku no  dezenvolve rai ne’e lao ba oin”, hateten Ministru Francisco.

Francisco dehan papel media importante atu ajuda governu no garantia katak governu ida ne’e sei la ataka fali media ou taka ema hotu nia liberdade espresaun.

Iha fatin hanesan Presidente KI, Virgilio Guterres iha diskusaun hateten koalia kona ba liberdade impresa, espasu ba meiu komunikasaun social, jornalista sira atu halao sira nia knaar iha kontextu responsabiliza sosial no hatutan informasaun ba públiku, hodi hakonu sidadaun nia direitu atu hetan informasaun ho lolos.

Virgilio haktuir iha tinan 45 liu ba, iha fatin ida ne’e, forsa polítika no militár ne’ebe sira hanoin katak ho oho jornalista sira bele taka lia los, tinan 45 liu prova katak lialos ne’e ema labele hakoi, ema bele hakoi jornalista nia isin mate, maibé lia los ne’e la bele hakoi. Ida ne’e sai referénsia ba  ita no governante sira, dalaruma iha kobertura sira ne’ebe kritiku hasoru governante sira, tenki simu hanesan kensekuensia hosi liberdade, kompromisu atu servi didiak povu, “tanba dalabarak ema hatete jornalista sira ne’e sempre hakerek mak buat at deit, buat diak be ami halo ne’e jornalista nunka fo sai. Hau sempre hatete ida halo diak ne’e ukun nain sira mak uluk promete ba povu iha kampnaha eleitorál atu halo diak, ukun karik halo diak bee moos, edukasaun, ida halo diak ne’e la presiza ema atu publika, jornalista nia funsaun ne’e atu buka tuir ida ne’ebe promete tiha la halo ou se halo mos, halo sala tan ida ne’e mak jornalista nia servisu atu fo sai”.

Orador sira iha diskusaun nakloke ne’e mak hanesan, Presidente KI, Virgilio Guteres,  Diretor Exekutivu CNC Hugo Fernandes, lider istoriku Dr. Jose Ramos Horta no MAPKOMS, Francisco Jeronimo.

LEAVE A REPLY

Please enter your comment!
Please enter your name here