Reportajen Joanina Casamiro
Komunidade iha Aldeia Amanu, Suku Manelima Postu Administrartivu Laklubar, Muinsipiu Manatuto, organiza malu hodi ateru rasik Estrada ne’ebé udan bo’ot estraga iha 4 abril 2021 no 16 abril 2023. Estrada aat hanesan ne’e fó Impaktu ba komunidade iha aldeia Amanu atu lori sira nia produtu ba iha merkadu.
Ba Neon Metin komunidade Aldeia Amanu, Suku Manelima, Elda Soares hateten, sente triste loos bainhira iha tempu udan, tanba udan bo’ot mai komunidade iha ne’e sempre sai vitima no estrada aat hotu-hotu no komunidade labele halo nia movimentu ba iha merkadu hodi lori nia produtu ba merkadu atu buka nia moris.
Nia haktuir, estrada iha Aldeia refere ne’e hahú aat bainhira tempu udan boot iha loron 4 Abríl 2021 ne’e, maibé iha veteranus ida husi Manatuto António Campos (Manu-Metan), agora matebian ona, nia maka lori tratór rua mai, hodi ajuda ateru fali estrada ne’e, maka kareta ho motor sira tama fali. Maibé iha 16 abril 2023 ne’e udan boot mai tan estraga tan fali estrada ne’e no Xefe Aldeia Amanu oraganiza fali komunidade sira iha aldeia ne’e hodi ke’e rai kuak sira ne’ebe monu hodi ateru fali estrada ne’e, maka komunidade sira halo nia movimentu hodi lori sira nia produtu ba iha merkadu.
“Ami hanesan komunidade haree estrada aat hanesan ne’e ami sente tristes tebes, tanba ami nia estrada aat ne’e akontese dala rua ona, ami komunidade la’o de’it mós la di’ak atu ba merkadu mós la di’ak, entaun ami nia Xefe Aldeia organiza ami ferik katus no joventude sira hodi hadi’ak semana ida nia laran ami ateru hodi la’o de’it, maibé kareta ka motór la’o ladiak,” dehan Komunidade Aldeia Amanu, Suku Manelima Postu Administrartivu Laklubar, Muinsipiu Manatuto, Elda Soares ba Neon Metin liuhusi viatelefone Domingu 25/06.
Nia esplika, estrada sira ne’ebé udan boot mai estraga hotu tiha, maibe to’o ohin loro ne’e governu ida nunka mai haree ka tau matan mai estrada ne’e. tanba husu ba governu foun mai, Bainhira akontese fila fali udan bo’ot sira hanesan ne’e favor ida, tenke tun direitamente mai haree problema ne’ebé maka komunidade sira hasoru iha area rural.
Nune’e mós, komunidade sira iha Aldeia Amanu, agradese ba Xefe Aldeia tanba nia iha fuan ne’ebe bo’ot hodi organiza nia komunidade sira hotu, no sempre hamutuk hodi hadi’a estrada ne’ebé maka udan boot mai estraga.
Entretantu Xefe Aldeia Amanu, Anibal Soares, dehan, durante ne’e Aldeia Amanu, suku Manelima Manatuto ne’e, udan bo’ot akontese dala rua ona, no udan boot mai sempre fó amiasa ba komunidade nia uma no estraga estrada iha ladeia refere, maibé husi parte governu rasik seidauk mai haree no tau matan ba estrada sira ne’ebé maka udan boot mai sobu no estraga ne’e.
“Ha’u senti triste tebes, tanba akontese udan bo’ot ne’e estraga hotu estrada no afeita mós ba komunidade balun nia uma, entaun hanesan Xefe Aldeia ha’u la labele haree deit, ha’u tenke organiza ha’u nia komunidade ferik, katuas no joventude feto no mane sira hotu, ajuda malu atu nune’e ami bele hadi’a fila fali estrada ne’ebé aat, tanba ami hein ba governu bainhira maka sira to’o mai atu hadi’a estrada ne’e, tanba ami iha ne’e problema barak maka ami nia komunidade sira hasoru, la’os de’it ba estrada, maibé ami nia Eletrisidade mós seidauk tama to’o ohin loron,” hateten Xefe Aldeia.
Nia esplika, se karik estrada ne’e a’at hein ba governu bainhira maka sira to’o mai atu haree entaun komunidade sira sai vitima hela de’it, liu-liu ba inan feto sira ne’ebé atu ba partus iha hospital, se kondisaun estrada aat hanesan ne’e kareta la bele tama oinsá maka sira atu ba partus ne’e, estrada aat ne’e feto inan isin rua sira sempre sai vitima tanba ne’e maka hakarak organiza komunidade sira hotu atu servisu hamutuk para inan feto sira la bele sai vitima.
Nia mós husu ba governu foun atu haree ba problema ne’ebé maka komunidade sira hasoru iha area rural, liuliu bai ha aldeia Amanu, tanba udan boot mai dala rua no sobu hotu estrada no komunidade rasik maka hadi’a no governu sira nunka tun mai hodi haree problema sira ne’e.