Reportajen Kontributor Moises Magno
Udan boot ne’ebe akontese iha municipiu Ainaro, hodi hamosu inundasaun tanba mota sae, halo rai monu hodi taka estrada no uma komunidade nian iha Aldeia Airaka-Lau Suku Aituto Postu Administrativu Maubisse Munisípiu Ainaro.
Komunidade afetady, Adelino Mendonca ba Kontributor Neon Metin informa kronolojia husi akontesementu ne’ebe akontese iha 3 Jullu, iha oras tuku 4:00 madrugada.
“Iha loron 3 Jullu oras tuku 04:00 madrugada, ami la espera katak atu akontese hanesan ne’e, tanba nia mosu mai ne’e derependete deit, sorte nia mosu tama uluk husi sala, sekarik husi kuartu sorin, karik labarik sira mate hotu. Ne’ebé tembok ne’e tarutu derependeti ami mós hafodak hodi halai sai”. dehan Adelino ne’ebé nia uma hetan estragus totál, 05/07.
Maibe Adelino agradese tanba membru familia tomak ho kondisaun diak, maske hela fatin hetan estragu makaas
Adelino afirma ho akontesementu ne’e, nia ho membru familia halai no evakua ba ih dapur, tanba momentu ne’e udan hela, maibe la espera dapur mós udan sobu hotu.
“Momentu ne’e ami halai sai hodi ba helik fali iha dapur nian ,tanba momentu ne’e udan hela, entaun ami ba dapur foin tur la tó minutu ida, ami halai sai deit ba rai liur tó naroman maka viziñu sira mai foti ami lori ba sira nia uma.” afirma komunidade afetadu ne’e.
Ho akontesementu ne’e inan feton Estela Mendonça da Silva, ne’ebe nia uma hetan estragus, husu governu no parte kompetente atu ajuda no hakmaan situasaun ne’ebé maka agora daudaun sira enfrenta.
“Difikuldade ne’ebé maka agora ami hasoru daudauk laos deit atu hare ba materiál uma nian, maibe ami nia produtu lokál mós afeta, balu ne’ebé maka iha tós laran mós rai taka hotu kedan. Ami husu governu bele loke matan mai ami, ho situasaun ne’ebé maka agora ami hasoru, ami fiar katak ita bóot sira sai hanesan ulun bóot rai ida ne’e nian, hodi fó mahon ba ami, ami hanesan povu buat ne’ebé ami hasoru no difikuldade ne’ebé ami hasoru hau fiar katak ita bót sira sei la taka matan ba ami.” Estela
Alem de Rai taka komunidade nia uma, dezastre naturais ne’ebe akontese fo impaktu mos ba Uma Naroman ba Povu iha area refere, ne’ebe hetan estragus makaas, no liña eletrisidade ne’ebe instala ona mate total, nune’e fo impaktu mos negosiante kiik sira nia sasán hanesan naan sira ne’ebe rai iha konjeladór