Reportajen Silvino Freitas
Ministériu Komérsiu no Industria (MCI) sei tau konsiderasaun ba pedidu husi diresaun nasionál sira, hodi hala’o avaliasaun ba funsionáriu kazuais sira ne’ebé kontratu remata ona, maibé nafatin bazeia ba nesesidade ministériu nian.
Tuir Ministru Nino Pereira katak, uluk hamutuk ho ministériu turizmu maibé hafoin ne’e hala’o mudánsa seluk hodi haketak ministériu turizmu, nune’e halo ona seprasaun ba funsionáriu permanente no kazuais sira inklui fasilidade sira fahe tiha ona ba iha ministériu turizmu nian, nune’e funsionáriu sira ne’ebé dadaun ne’e iha hamutuk 201 mak sai forsa traballu ba MCI hodi utiliza hodi bele atinji metas tuir polítika públika ministériu nian.
“Ita sei haree funsionáriu kazuais sira tanba ita sei la husik timoroan ida iha kotuk, ita mós la koalia kona-ba kores polítika maibé presiza haree mak espiritu serví, presiza ekipa boot atu serví tuir nesesidade ministériu nian” dehan MCI Nino Pereira hafoin sorumutu alargada ho funsionáriu sira iha CCD, (31/08).
Nino Pereira haktuir tan katak, iha ona ekipa ida ne’ebé sei hala’o servisu avaliasaun hodi haree no hatuur kritéria balun ne’ebé iha posibilidade atu fó kontinuasaun ba funsionáriu kazuais sira, mekanizmu ne’e mak sei haree, maibé nafatin ka’er ba nesesidade ministériu nian, tanba funsionáriu kazuais sira mós hapara tiha ona, maibé ministériu simu nafatin pedidu husi diresaun nasionál sira tanba ne’e sei fo konsiderasaun hodi tetu tuir avaliasaun ne’ebé dadaun ne’e la’o hela.
“Pedidu lubuk ida mak ona meja leten nune’e nafatin haree ba ekipa avaliasaun ne’ebé la’o hela servisu hamutuk diresaun nasionál rekursu umanu hodi bele to’o momentu ne’ebé atu halo dezisaun ba ita nia funsionáriu kazuais sira estende tan sira nia kontratu no sei halo mós konsultasaun ho komisaun funsaun públika” dehan Nino Pereira.
Nia konklui katak, nia mós rekoñese maskí iha funsionáriu permanente liu 200 maibé sei prezisa funsionáriu kazuais sira, nune’e mós prestasaun servisu husi funsionáriu kazuais sira di’ak liu fali funsionáriu permanente sira, nune’e mós funsionáriu permanente sira mai ho arogante hodi fó hotu servisu bá funsionáriu kazuais sira.