Reportajen David da Costa
Eskola Basika Filial (EBF), Neon Pene iha Postu Administrativu Oesilo, Suku Bobometo, Aldeia Nianapo, Rejiaun Administrasaun Espesial Oe-cusse Ambeno (RAEOA), ne’ebé menus iha Fasilidade Kadeira, Meza, Sala de Aula ba estudante sira ne’e, Edukasauun RAEOA rekoñese katak iha eskola Oekuse barak maka sei menus ba fasilidade, tanba ne’e, ba oin sira sei haree problema ne’e atu bele resolve.
Diretór Edukasaun, Rejiaun Administrativu Espesiál Oekusse Ambeno (RAEOA), Daniel Maunu, hateten, Kona-ba falta Meza kadeira no sala aula menus ba estudante sira iha Eskola EBF Neon Pene iha postu administrativu oesilo, suku Bobometo, Aldeia Nianapo, RAEOA ne’e, sira rekoinese katak sei menus duni fasilidade ba eskola, la’os menus iha EBF Neon Pene ne’e de’it, maibé iha eskola seluk mós sei menus hotu ba fasilidade.
Maibé foin lalais Ministeru Edukasaun tranporta ona Meza kadeira ba eskola sira hotu iha postu administrativu haat iha oekusse ne’e, hahú husi nivel pre-ekolar, Eskola Ensinu Basiku Primeiru to’o Terseriu Sikulu, depois ba iha Ensinu Sekundariu hotu i inkuli mós Meza kadeira ba professores sira hotu. Maibé ba eskola sira iha urbana ne’e seidauk bele lori bá, tanba tranporte tula fasilidade sei aat hela, maibé ba iha area rural sira lori ba ona mas sei la to’o nafatin.
“Ha’u hanoin foin lalais ne’e ita halo ona tranportasaun ba Meza kadeia ba eskola hotu-hotu, Portantu, Karik Meza no kadeira seidauk to’o numeru ne’ebé estudante sira iha, loos duni, ida ne’e ita rekoinese, maibé la’os laiha, ita fahe hotu Meza kadeira ba iha eskola hoto-hotu, soke nia numeru maka la to’o. Entaun haree ba ida ne’e, ita sei tau iha planu nafatin ba materiais Meza kadeira, inklui sala Aula ba estudante, Bee moos no haris fatin ba estudante sira iha kada tinan, ita sei kompleta neineik, neineik ita sei to’o iha ne’ebá,” Diretór Edukasaun RAEOA, Daniel Maunu, ba Neon Metin iha Nia knaar fatin Sana Rosa Oekusse, Tersa 29/08.
Nune’e antes ne’e, Koordenador Eskola Basika Filial (EBF) Neon Pene, Eurico Neno, espresa nia sente triste tanba Timor-Leste ukun-an ona tinan 20 liu, maibé eskola EBF Neon Pene, sei kontinua menus ba iha Fasilidade hanesan Kadeira, Meza, sala de Aula ba estudante. Be’e Moos, no haris fatin ba estudante sira.
“Iha eskola EBF Neon Pene iha haris fatin 4 maibé ida de’it mak diak. No Iha eskola refere iha klase 6 no kada klase iha estudante 45 Pessoas. No iha eskola Basika Filial Neon Pene Total estudante nain 111 ne’ebé kompostu husu mane 52 pessoas no Feto 59 pessoas,” Dehan Kordenador Eurico Neno, liu-husi via WhatsApp ba Neon Metin iha loron segunda 21/08.
Nia haktuir, Dala barak ona, hato’o ona pedidu ba iha parte relevante sira kona-ba fasilidade sira ne’ebé menus iha eskola refere, no foin dadaun husi Ministeru Edukasaun maka apoiu kadeira 40 no Meza 40 maibé seidauk sufisiente. Tanba ne’e husu nafatin ba iha parte relevante sira atu bele apoiu nafatin ba iha eskola ne’e.
Iha fatin hanesan reprezentante estudante husi Eskola EBF Neon Pene, Renata da Costa Neno Cauna, sente triste, tanba iha aula ida estudante nain rua maka uza lesuk kadeira ida hodi tur.
“Ami sente triste, tanba kadeira ida ami nain rua maka uza ida, entaun ami atu hakerek mos la di’ak, dala ruma ami hamrik de’it mak foin bele hakerek,” nia dehan.
Nune’e mós estudante Alexandre Virgilio Caunan, haktuir, iha eskola ne’e mós menus be’e moos no haris fatin aat hotu, susar estudante sira uza wainhira sira presiza.
“Ami haris fatin 4, maibé ida de’it mak di’ak no ami hotu uza haris fatin ida de’it, ida ne’e mós problema ida. Dala ruma ami atu ba haris fatin, maibé iha haris fatin Be’e moos la iha,” nia espresa.
Ho problema hirak ne’ebé EBF Neon Pene hasoru, estudante nain rua ne’e husu ba Ministru Edukasaun, atu bele resolve problema ne’ebé maka sira nia eskola ne’e hasoru, atu nune’e sira bele aprende no estuda ho di’ak no seguru.
