Reportajen Silvino Freitas
Ministériu Komérsiu no Indústria (MCI) halo enkontru alargada ho funsionáriu permanente sira, hodi haree kapasidade funsionáriu atu oinsá bele implementa no asegura polítika ministeriu nian, tanba ne’e presiza haree ba oinsá bele hala’o servisu iha ekipa ka super team.
Ministru Nino Pereira hateten, enkontru alargada ho funsionáriu permanente ne’e nu’udar parte ida atu haree ba servisu ne’ebé hala’o ona nomós servisu sira ne’ebé sei planeadu hela ba loron 120 nian, nune’e presiza konsolida forsa traballu ministériu nian hodi aproveita rekursu sira ministériu nian atu alkansa polítika públika ne’ebé planeadu ona.
“Prosesu ne’ebé hala’o ona iha loron 60 nian mak ita iha ona programa no organika nonu governo nian orsamentu retifikativu no organika minisiteriu ne’ebé iha ona, tanba ne’e tenke asegura servisu sira ne’e” dehan MCI Nino Pereira bá jornalista sira hafoin sorumutu alargada iha CCD, (31/08).
Nia dehan, komponente importante iha ministériu mak funsionáriu sira atu bele hola parte tanbe ne’e mak minisiteriu nia riku-soin, nune’e presiza haree kapasidade funsionáriu atu oinsá bele implementa polítika nonu governo nian ne’ebé kabe mai iha MCI hodi foku ba iha programa loron 120 inklui planu sira iha 2024 nomós tuir mai.
“Minisiteriu sei hala’o retiru ida hodi haree mós planu asaun anuál ba 2024 kona-ba planu no atividade inklui mós orsamentu” dehan Nino Pereira.
Nia konklui, husi enkontru refere mós ko’alia kona-ba planu ezekusaun tanba presiza iha kualidade ezekusaun la’ós kuantidade de’it, tanba presiza orienta ba funsionáriu sira atu bele hapaar, nune’e mós ba kargu xefia sira nafatin fó konfiánsa atu bele asegura intese ministeriu nian, la’ós atu haree se mak servisu liu maibé tenke servisu iha ekipa, laiha super hero maibé iha mak super team atu bele asegura polítika ministeriu nian, liu liu espanda merkadu promosaun infrastructura iha industria no komersiu nian hala’o mós koordenasaun ho ministeriu relevante atu asegura planu loron 120 no tinan hirak mai.
