Reportazen ekipa neon metin
Asosiasaun Jornalista Timor Lorosa’e (AJTL) realiza formasaun konaba Literasi media digital hodi kombate nutisia falsu no informasaun bosok (Fake news and hoax) iha social media ba estudante Komunikasaun Sosial hosi UNITAL.
Liu hosi abertura ba formasaun ne’e Prezidente AJTL, Zevonia Vieira ba paritisipantes hateten AJTL iha responsabiliade boot ida ba nia membru sira, oinsa atu hasae sira nia konnesementu no abilidade relasiona ho mundu jurnalismu, liu-liu konaba literasia digital, atu nune’e membru sira iha konnesmentu konaba saida mak informasaun los no falsu, atu nune’e tulun ita nia audiensia atu la monu ba lia bosok ka falsu sira.
“Iha era digital informasaun falsu no bosok kontinua akontese, liu-liu iha internet. Ho Nune’e estrutura AJTL hanoin katak presiza tebes fahe abilidade ba nia membru sira, hasae konnesementu ba nia membru sira laos jornalista deit maibe mos estudante komunikasaun social sira, atu iha ona konnesementu baziku atu oinsa bele tulun hamenus no kombate informasaun falsu sira ne’ebe akontese, liu-liu iha propagasaun COVID-19, ne’ebe dalaruma halo publiku sira sai vulneravel tanba informasaun falsu sira ne’e”, hateten Prezidente AJTL, iha salaun Konsellu Imprensa, 07/10.
Prezidente AJTL hateten AJTL iha responsabilidade hodi kontinua hatoo informasaun ka lia los ba publiku liu kobertura ne’ebe halo. AJTL mos iha responsabilidade prepara estudante komunikasaun social sira hodi prepara sira nia an, sekarik aban bainrua sai jornalista, bele sai jornalista kualidade ne’ebe mak defende duni lia los iha nasaun demokratiku ida ne’e.
“AJTL nia misaun boot mak kontinua luta ba Liberdade imprensa no espresaun iha Timor-Leste no serbisu hamutuk ho membru sira hamutuk ho Konsellu Imprensa kontinua kombate fake news no hoax no kontribui paz no defende direitus umanus iha Timor-Leste”, hateten Zevonia.
Iha fatin hanesan Embaixadora Estadu Unidos Amerika ba Timor-Leste, Kathleen Fitzpatrick hateten sente orgullu apoia dezenvolvimentu Timor-Leste nia jornalista-sira ho fó apoiu ba workshop kona-ba importánsia profisionalizmu no ezatidaun iha jornalizmu no mídia. Maibe importante mós kona-ba liberdade espresaun iha sosiedade livre no ezatidaun iha reportajen.
Nia dehan iha Timor-Leste, Estadus Unidus no sosiedades demokrátikas hotu-hotu, jornalista-sira dezempeña papel ida ne’ebé importante tebes.
“Jornalista di’ak fó informasaun ne’ebé ema presiza, hodi halo desizaun koretu no halo líder-sira toma responsabilidade, katak jornalista sira bele serbisu ho efetivu liután ba justisa no direitus umanus, nune’e governu bele reprezenta sira ho di’ak liután”, hateten Kathleen Fitzpatrick.
Tuir Embaixadora Kathleen katak jurnalizmu livre, independente nu’udar pilar ida demokrasia nian no razaun Estadus Unidus ho orgullu apoia jornalista-sira iha mundu tomak.
Embaixador fo hanoin fali katak iha Timor-Leste, ita haree ona respeitu klean ba jornalista-sira hotu ne’ebé konta ita-boot sira-nia istória no alerta mundu kona-ba Timor-Leste nia korajen no sofrimentu durante tempu Rezisténsia.
Embaixada Estadus Unidus esforsa makaas hodi onra no lao tuir jornalista sira nia kompromisiu ba nasaun ida-ne’e. Iha espíritu ne’e maka ami apoia jornalizmu iha Timor-Leste liuhusi programa formasaun oin-oin kona-ba jornalizmu hanesan ohin ho ida-ne’e.
“Ami orgullu fornese orsamentu ba Asosiasaun Jornalizmu Timor-Leste hodi apoia programa ne’e. Ida-ne’e parte husi Estadus Unidus nia esforsu hodi kontra dezinformasaun no apoia jornalizmu investigativu bazeia ba faktu iha mundu tomak”, hateten Embaixadora EUA
Nia mos dehan Tinan oin, EUA sei kontinua knaar importante ne’e liuhusi kooperasaun ho AJTL, hodi kria Literasia Mídia “Tech Camp” ne’ebé sei lori espesialista internasionál sira mai Timor-Leste, hodi serbisu ho jornalista lokál sira, atu kria solusaun ba problema espalla informasaun falsu online.
Membru sira balun husi AJTL no Konsellu Imprensa hola parte ona iha ami-nia programa interkámbiu no ha’u kontente tebes haree kooperasaun ne’e kontinua ba oin.
Iha hanoin hanesan mos hatoo hosi Konselhor konsellu Imprensa, Francisco Belo katak jornalista nia papel importante atu kombate fake nes mak tenke halo verifikasaun tuir kodigu etika jurnalistika ne’ebe iha antes publika.
nia mos dehan Konsellu Imprensa kontinua serbisu hamutuk ho asosiasaun jornalista atu kapasita jornalista tanba misaun boot KI nian mak luta ba liberade imprensa no espresaun no mos kontinua kombate informasaun falsu ne’ebe la fo benefisiu ba publiku iha Timor-Leste.
Estudante hosi UNITAL hamutuk nain 15 mak partisipa iha formasaun refere, no sei kontinua formasaun ba universidade sira seluk durante fulan neen (6). Programa ne’e hetan apoiu orsamentu hosi Estadu Unidos Amerika no serbisu hamutuk ho Konsellu Imprensa.
