Reportajen David da Costa
Delegasaun husi Organizasaun Mundiál Komérsiu (OMK), ne’ebé akompaña husi Embaixadora Timor-Leste iha Zenebra, hasoru malu ho Prezidente da Republiksa (PR) José Ramos Horta, hodi afirma katak Timor-Leste sei adezasun ba Organizasaun Mundiál Komérsiu iha Febreiru 2024.
Embaixadora Republika Timor-Leste iha Zenebra, Lurdes Bessa, hateten, Ohin enkontru ida ne’e kona-ba prosesu adezaun Timor-Leste nian ba iha Organizasaun Mundiál Komérsiu ka WTO ne’ebé prosesu ida ne’e Timor Leste hahú desde iha tinan 2016, agora iha faze finál ona besik atu remata. Neébé Timor-Leste sei adezaun ba iha OMK ne’e tinan oin.
“Ita atu sai membru OMK iha Fevereiru 2024, durante reuniaun Ministeriál ne’ebé sei halo iha Abudabi. Iha faze finál asuntu buat balun ne’ebé ita tenke resolve, tenke trata mak delegasaun ida mai atu kompleta prosesu adezaun ida ne’e to’o tinan ida ne’e remata, tinan oin mai ita konfirma ita nia adezaun ba organizasaun mundiál komérsiu,” dehan, Embaixadora Republika Timor-Leste iha Zenebra, Lurdes Bessa, ba jornalista sira iha Palasiu prezidensiál Bairo-Pite, kuarta 6/09.
Nia haktuir, Timor Leste nia preparasaun ne’e la’o kleur ona, Timor hahú nia servisu tinan neen ona ne’ebé iha envolve iha negosiasaun bilaterais estadu unidus lubuk ida hamutuk sia ka sanolu ne’ebé Timor-Leste sei taka asina akordu billaterais ho país hitu inklui mós Uniau Europeia.
“Maibé, agora falta rua de’it mak Estadus Unidus ho Indonézia ida ne’e mak ita sei resolve, falta de’it uitoan atu ita taka durante fulan ida ne’e karik ita sei taka ona. Ita mós hetan apoiu maka’as husi Organizasaun Mundiál Komérsiu ne’e rasik,” Nia esplika.
Iha prosesu adezasaun ba OMK ne’e, Prezidente Repúblika José Ramos-Horta mós akompaña prosesu ida ne’e desde hahú to’o agora, no governu mós garante katak Timor fó resposta ikus iha tinan ne’e, no iha tinan oin mai Timor-Leste adezaun ba Organizasaun Mundiál Komérsiu.