Reportajen David da Costa
Primeiru Ministru, (PM), Kay Rala Xanana Gusmão, hatete, osan falsu $4 miloens ne’ebe maka horsehik Polisia Nasiona Timor-Leste (PNTL) halo buska iha iha Bidau ne’e tenke halo investigasaun ne’ebe maka klean, osan ne’e tama husi ne’ebe, husi rai, tasi ou airo.
“Agora investigasaun ne’e mak tenke metin, tenke kle’an nune’e hatene, osan ne’e mai ho saida. Ita haree de’it katak, $20 mill dolares dala ruma ita tau iha bolsu, mais $4 miloens ne’e, horsehik mós ha’u haree iha kaixa ki’ik, kada kaixa ida iha $30 mill signifika buat ne’e boot tebe-tebes,” dehan Primeiru Ministru Xanana ba Jornalista sira iha Palásiu Prezidensiál Bairo-Pite, kinta 16/04.
Nia subliña, “Oasan falsu ne’e mai husi ne’ebé, hodi bolu atensaun, se mai husi Tibar entaun iha Tibar tenke responsabiliza bolu atensaun tanba sa mak imi husik buat ne’e liu. Husi aviaun labele, barak tebe-tebes, ne’e só husi Tibar ka husi rai, ka husi ro mai Tibar ka husi rai, ida ne’e mak investigasaun tenke la’o nafatin hodi ita hapara tiha problema ida ne’e osan falsu”
Nia esplika, nia rasik ba iha portu Tibar, haree buat ne’e kapás, tama, sai, saida mak iha kontentor nia laran ne’e, Maibé tanba saida maka osan falsu sira ne’e bele liu tiha mai.
“Ne’ebe horsehik depois Konsellu Ministru hakerek iha whatsap, ha’u ba to’o iha fatin, ba fali polísia, sira konta hela istória, relatóriu husi polísia seidauk to’o mai ha’u,” nia dehan.
Nia haktuir, seidauk simu relatoriu kompleitu husi polisia maibé iha relatoriu balun sira dehan katak ema balun uza osan falsu ba iha loja Sentru Pantai Kelapa.
“Mais relatóriu liu de’it mak, ema ida ba iha loja Sentru ida iha Pantai Kelapa ba sosa sasan iha loja haree katak, osan falsu. Osan falsu ne’e mak loja ne’e dehan ba Banku Central, dehan ba polísia ne’ebé Ministériu Públiku, depois haree tuir CCTV, ema ne’e sai, tama iha nia karreta ne’ebé sira ba to’o uma iha Bidau Masau, ema sira lori hotu ona ba polísia ona, atu investigasaun,” nia informa.
Tanba ne’e horseik ba to’o kedas iha kantor polsia sira konta dehan horseik sira halo aprensaun ba osan falsu $4 miloens iha Bidau, no ohin inform aida ne’e mos ba prezidente Republika José Ramos-Horta.
“Horsehik ha’u to’o iha ne’eba sira konta hela serka $4 miloens, ne’e mak ita seidauk hatene loloos, Sira sei hala’o hela relatóriu, ne’ebé ha’u informa ba Prezidente, Prezidente dehan favór fó hatene ba ita nia instituisaun sira, nune’e tau kedas nia iha kadeia ona, labele kumpri de’it oras 72 fila ona hanesan ne’e,” nia dehan.
Xefe Governu ne’e mos apresia tebe-tebes asaun ne’ebe mak Ekipa Diresaun Servisu Investigasaun Kriminal husi Polísia Nasional de Timor-Leste (PNTL) ho nia instituisaun sira seluk hala’o hodi detekta osan falsu ne’e.
