Reportazen David da Costa Gusmao
Ministeriu Saude (MS) rejista tan konfirmadu posivitu COVID-19 nain 1, liu hosi konferensia imprensa, Koordenador Jeral COVID-19, Odete da Silva Viegas informa ba jornalista sira katak Ministériu Saúde rejista tan estudante sidadaun timór-oan nain ida, ne’ebé konfirmadu kazu COVID-19, pasiente mane ho idade 15.
“Ita nia maluk ne’e laiha sintomas no Dadaun ne’e pasiente refere ami evakua ona ba sala izolamentu iha Oe-cusse”, dehan Odete ba Jornalista sira iha palacio da Cinzas kaikoli, 29/01.
Nia esplika Iha 4 Janeiru 2021 nia hala’o viájen ba Atambua-Indonézia ho motór privadu, ninia razaun atu prolonga visa. Iha Fatubanao, Atambua nia hela durante semana 2 iha ninian tio nia uma.
“Iha 18 Janaeiru tuku 13:30 oras Indonézia nian sidadaun ne’e viajen husi Atambua mai Wini no toba tan kalan 2 iha Wini parte Kefa nian. Iha 20 Janeiru 2021 nia tama Timor-Leste liu hosi fronteira Sakato, Oe-cusse hamutuk ho estudante na’in 7 seluk. Ekipa COVID-19 koloka kedas sira ba halo kuarentena iha ótel Oeupun, iha Rejiaun Administrativa Oe-cusse Ambeno”, dehan Odete Viegas.
Koordenador COVID-19 konklui katak ekipa vijilansia halo teste Swab ba sira iha loron 28 Janeiru no rezultadu teste hosi laboratóru relata katak sidadaun ne’e positivu COVID-19 no dadaun ne’e pasiente refere evakua ona ba sala izolamentu iha Oe-cusse.
Nia sublina maluk ne’ebé hela iha kuarentena Oeupun hamutuk na’in 68, sira tama ho data ida ne’ebe la hanesan, sira ne’ebe liu hosi dalan legal mak nain 8 ne’e no 56 seluk liu hosi dalan ilegal.
Entertantu dadus kumulativu teste 18.902, hein rezultadu 166, kumulativo kazu 69, komulativu rekuperadu 54, kazu foun aumenta 1, atuál baixa 19, rezultadu negativu 18.667.
Total Kuarentena iha 230 kompostu husi Dili 128, Munisípiu 102, auto kuarentena 192 kompostu husi Dili 181, munisípiu 11, pasa ona loron 14 iha 7.497, Dili 6.182 no munisípiu 1.315.
