Reportajen Estajiariu Filomena da Conceiçao
Unijma/Atevista Pro Republika Demokratika Timor-Leste (RDTL), husu ba Prezidente Repúblika (PR) Dr. José Ramos Horta, atu halo diálogu ho povu, tanba povu agora halerik hela ba justisa, no justisa balun sei fó perturbasaun ba povu.
Liafuan ne’e hato’o husi Portavoz Unijma/Atevista Pro RDTL “Teki Liras” husu atu hala’o dialogu. Nia dehan se karik problema ida ne’e laiha solusaun ,mak sei organiza membru sira hotu husi Unijma/Atevista pro RDTL no Organizasaun masa, Konsellu Popular de Defeza Republika Demokratiku Timor-Leste (CPD-RDTL), hodi tun hotu iha tempu badak hodi halo nakonu sidade Dili.
“Nu’udar estadu ba povu, atu hala’o diálogu ho setòr Kultura, se kuandu kualkuer autoridade sira la ba, maka masa sei tun iha Dili, ida ne’e sei nakonu ho masa CPD-RDTL ho UNIJMA/ativista Pro RDTL,” dehan Teki Liras iha Palásiu Prezidensiál Bairo-Pite, Segunda 10/10.
Nia haktuir Xefe Estadu nu’udár aman ba Nasaun RDTL nian, tanba ne’e tenke haree mós lei, tanba dalaruma lei ne’e bele soran fali polisia ho povu, no polisia ho estadu tanba povu sei halerik hela ba justisa.
Iha fatin hanesan Assessor Sosiedade Sivíl Palacio Prezidénsia, Quintiano Moniz Carvalho hateten palásiu Presidente nakloke ba ema hotu, atu hato’o ida-idak nian difikuldade, ho ida ne’e ezijénsia husi Unijma/atevista pro RDTL nian sei hato’o ba Prezidente Repúblika.
“Ami sei hato’o fali ezijénsia Unijma/atevista pro RDTL nia ba Presidente Republika kona-ba sira nia ezijénsia sira nee, mais ita la hatene kona-ba sira nia objetivu saida, mais hau sei hatene no hau sita oituan de’it sira hakarak izije atu dialogu ho komunidade sira” Dehan nia.
