Home Feature Hosi Família Simples, Estefania ho nia Grupu GWPC Fasilita Joven Aprende Lian...

Hosi Família Simples, Estefania ho nia Grupu GWPC Fasilita Joven Aprende Lian Korea

551
0
Estefania Marta Madalena da Costa Soares. [Foto: Joanina | 04.08.2022]

Reportajen Joanina Casemiro

Moris simples ho situasaun difisil iha família la sai sasukat ba ema atu la susesu iha nia jornada moris, maibé depedende ba motivasaun boot hodi halao moris ne’e. Ida ne’e mak Estefania Marta Madalena da Costa Soares, moris hosi familília agrikultór iha sidade Díli ho maun-alin na’in 7, feto 2 no mane lima. Estefania moris iha Díli, Postu Vera-Cruz, aldeia 01 Centro Unidade Caicoli, iha loron 26 fulan Dezembru 1997 (24), hosi aman Pedro Soares no Inan Teresa Mendes da Costa. Estefania joven kreativu ida, nia moris simples maibé nakonu ho domin no nia iha korajen boot hakarak fahe ba nia maluk ho kbiik mak nia iha.

Nu’udar joven kreativu ho espíritu ne’ebé boot, nia hakarak fahe nia matenek ba nia maluk sira ho saída mak nia hetan iha nia formasaun iha nasaun Korea Súl hodi loke sentru formsaun lian Korea ba joven sira ne’ebé mak laiha kbiit atu kontinua estudu. Maske durante ne’e ho difikuldade oin-oin maibé la hamate nia espíritu hodi kontinua la’o ba oin, hodi fahe nia matenek ho vontade ne’ebé boot ba joven sira ne’ebé hakarak aprende lian Korea.

“Dadaun ne’e ha’u nu’udar fundadora ba iha Grow With Purpose Center (GWPC). Organizasaun ida ne’e hamriik hosi ha’u nia opiniaun rasik ho objetivu atu fasilita ba joven sira ne’ebé  laiha kbiit atu asesu ba eskola, maibé la’os ba ha’u nia aan de’it, maibé liu husi mehi ida ne’e hakarak atu dezenvolve mos ba iha maluk joven sira ne’ebé iha espíritu hakarak atu aprende lian Korea,” nia dehan.

Caicoli oan ne’e esplika, organizasaun GWPC lian Korea ne’e lokaliza iha área Caicoli-Dili, da-daun ne’e nia halibur ona joven barak inklui estudante sira ne’ebé hakarak atu aprende lian Korea  hamutuk ema na’in 360, ne’ebé mai hosi munísipiu diferente ho objetivu atu aumenta sira nia koñesimentu no hasa’e sira nia kapasidade iha lian Korea no seluk tan. Nia konta, nia esperiénsia pesoal moris iha família mak sempre ajuda nia papa no mama halo to’os no fa’an modo.

“Hau nu’udar oan dalima (5), hosi maun-alin na’in 7. Husi ki’ik  ha’u sempre akompaña mama ho papa ba to’os hodi ajuda ku’u kanko ba fa’an iha merkadu, atu nune’e hetan netik osan hodi sustenta ba ami nia moris loron-loron nian. Ha’u nia  papa ho mama nu’udar agrikultor ne’ebé buka moris ho kanko. Ami nia aktividade moris lor-loron nian mak troka malu ajuda inan-aman sira ba buka moris iha merkadu hanesan fa’an kanko,” Estefania konta.

Wainhira sira sei fa’an kanko nia sente kontente tebes, maske moris nu’udar agrikultor simples maibé nakonu ho domin. Sei ki’ik nia sente haksolok tebes, tanba maske ho ida ki’ik nia bele ajuda nia inan-aman buka osan hodi sustenta sira nia nesesidade lor-loron nian, maibé nia sente triste tanba tinan 10 resin liu iha loron 30 Fulan Dezembru 2009 to’o loron  Fulan Janeiru 2010, governu hasai sira nia fatin kuda kanko sein koñesimentu hosi sira, tanba ne’e mak sai dezafiu boot ba sira momentu ne’ebá hodi buka osan sustenta sira nia família.

Joven idade 24 ne’e espresa, hafoin situasaun difisil ne’e, nia pai ho main deside fila-liman nu’udar negosiante ambulante iha dalan ni-nian. Hosi ne’e nia finalidade mak sira hotu konsege akaba estudu hosi ensinu Sekundáriu no balu kontinua ba universidade, balu lae tanba kestaun finanseiru. Tinan 2018 lori ksolok ba Estefania tanba nia hala’o teste no liu iha universidade UNTL iha Fakuldade Medisina, Departamentu Laboratóriu, momentu hanesan nia aplika mos ba bolsa de estudu hosi The Center for Korean Study (CKS) UNTL, no selesionadu hodi hala’o estudu tinan ida hosi 2019-2020, iha Chonnam National University (CNU), Korea Súl.

“Ha’u fila mai la konsege kontinua estudu tanba osan laiha, tanba impaktu husi moras mundial Covid-19 ne’ebe mundu tomak enfrenta no dada tempu naruk inklui kapasidade la to’o tuir eskola online tan fasilidade inkompletu. Iha dia 30 Agostu 2021, ami komesa harii ona Sentru Formasaun ho naran ‘Grow With Purpose Center’ (GWPC) ne’ebé lokaliza iha Caicoli, Dili, no hahú aulas iha loron 21 Fulan Fevereiru 2022 to’o ohin loron.”

Estefania hatete, Sentru ne’e hetan fundus husi sira nia inan-aman rasik ho total osan kuaze $3500 hodi estabelese sede, tanba haree ba sira nia espíritu nasionalizmu no patriotizmu ne’ebé aas, tanba ne’e mak sira nia inan-aman deside fo fatin no apoiu moral hodi harii duni sentru refere. Oras ne’e sentru refere iha estudante ne’ebé aprende lian Korea hamutuk 360 resin ho formador na’in 5. Formasaun lian Korea ne’e la’o fulan 4 ona. “Maske ho difikuldade sira ne’e hotu ha’u la haluha agradese ba Aman Maromak ne’ebé sempre akompaña ami nia jornada moris ida ne’e.” Nia agradese  ba susesu ne’ebé nia atinji da-dauk ona.

GWPC nu’udar organizasaun ida ne’ebé independente husi kualker orgaun podér politíku sentral ka lokal. GWPC ho nia lema “esforsu nafatin fiar aan hodi realiza ho nia objektivu tanba o mos bele”. Estefania enkoraja estudante sira katak katak estudante mak abut ba susesu no estafeta nasaun nian, tanba estudante mak na’in ba dezemvolvimentu.

“Razaun ami kria Sentru Formasaun ida ne’e nu’udar ami nia kontribuisaun simples ida ba ami nia rai doben ida ne’e. Tanba wainhira joven ida mak hatene lian Korea no teste, passa ba servisu iha Korea, ami mos sente kontente, tanba ami hanorin iha benefísiu ba joven sira, hanesan asaun positivu ida, tanba wainhira joven ida nu’udar traballador iha Korea bele ajuda no hakmaan ona família nia terus no susar, konsertaza bele ajuda hakmaan ona inan-aman nia preokupasaun sira.” Estefania dehan.

Grupu GWPC nia objetivu mak atu hasa’e koiñesimentu no kapasidade ho kualidade hodi kontribui ba rekursu umanu nian liu hosi kapasitasaun no formasaun intensivu, kria mos paz no estabilidade iha rai laran. GWPC ho misaun mak hanesan dedika estudante sira ho konsiénsia profisional bazeia ba lei no orden no dezenvolve parseria ho entidade lokal, nasional no internasional sira hodi enrikese aan no asegura prosesu aprendizajen ho kualidade. Tanba ho estudante nia partisipasaun kontribui ba dezenvolvementu, tanba estudante sai nu’udar fator determinante ba nasaun nia susesu.

GWPC mai ho vizaun katak hasa’e koñesimentu estudante nian ho efektivamente hodi hamenus dezempregu iha Timor-Leste. GWPC nu’udar Sentru Formasaun ida ne’ebé foka liu ba edukasaun, multi-lingua no multimedia. Maibé tanba fasilidade la kompletu sira la’o uluk ho sentru formasaun lian Korea nian. Alein de ne’e wainhira hetan ona apoiu husi entidade relevantes, ho inisiativu no esforsu tomak sira hakarak loke tan sukursal iha área rural sira, atu nune’e sidadun hotu-hotu bele aprende ho di’ak liu tan, ho domin no esforsu iha futuru oin mai bele di’ak liu tan, esperansa Estefania nia ba nia grupu GWPC.

Estefania hahú nia eskola Pre-Primária Matadouro iha tinan 2005, eskola Primária Públiku nú. 1  Rumbia Caicoli hosi tinan 2006-2011. Nia kontinua nia Pre-Sekundária iha Ensinu Bazika Central (EBC) Fatumeta, Dili hosi 2012-2014 no kontinua ho nia ensinu Sekundaria iha eskola Sekundária Geral 5 de Maio, Becora Dili iha tinan 2015 no remata iha tinan 2017, no agora da-dauk hala’o nia estudu iha Universidade Nasional Timor Lorosa’e (UNTL), iha Fakuldade Medicina e Ciência de Saúde, Departamentu Laborátoriu.

Print Friendly, PDF & Email

LEAVE A REPLY

Please enter your comment!
Please enter your name here