Reportajen Adroaldo ‘Saretukau’
Sekretária Estadu Juventude no Desportu (SEJD) halo lansamentu ofisial ba preparasaun atleta nasionál ne’ebé sei partisipa iha Sea Games Vietname 2022, ho tema “Timor-Leste ba Prestasaun”, ne’ebé sei partisipa hosi atleta timoroan 45 hosi federasaun 7 ho modalidade 8, iha fulan Maiu tinan ne’e.
Iha diskursu ba lansamentu ne’e, Sekretária Estadu, Abrão Saldanha hatete lansamentu ida ne’e importante tebes ba preparasaun atleta Timor oan ne’ebé sei partisipa iha eventu importante Sea Games iha tinan ida ne’e.
“Ita hotu hatene katak desportu la’os de’it reprezenta prestasaun, maibé reprezenta mos orgullu ba federasaun ida-idak, oinsá mak hatudu ezisténsia estadu ida, povu ida, iha nasaun sira seluk, estadu selu-seluk. Tan ne’e mak ita hotu orgullu, reprezenta ita hotu iha Sea Games,” hato’o Sekretária Estadu Abrão hodi enkoraja altleta sira, wainhira partisipa iha Sea Games tinan ne’e, iha Timor Plaza, 05/01.
Governante ne’e akresenta katak polítika governu nia hodi halakon tiha lia-fuan partisipa, tanba agora da-dauk Timor-Leste mos prepara nia ema hodi hatudu prestasaun rasik, “ha’u dehan ona ba Prezidente Federasaun sira, ita para ona ho lia-fuan partisipa, ita tenki hahú hanoin ona konabá prestasaun,” tenik Sekretária Estadu Abrão.
Nia rekoñese katak federasaun sira hasoru difikuldade tanba sei iha apoiu ne’ebé sufisiente hodi halo preparasaun ba prestasaun atleta sira, maibé governante ne’e nafatin motiva no husu vontade federasaun nian hodi bele prepara atleta sira ho máksimu ba preparasaun iha jogu Sea Games ida ne’e.
Nia mos husu nafatin ba atleta sira atu kuidadu aan fizikamente, iha ai-han sira mak kontein konteúdu kímiku ne’ebé bele afeta ba kanselamentu atleta nian iha jogu wainhira hetan detekta hosi komisauna antes tama kompetisaun ka bai-bain bolu doping katak proividu sira ba hahan, antibiótiku ka ran no seluk tan hodi hasa’e performánsia atleta ida nian durante jogu nia laran.
“Ami hakarak dejeza susesu ba preparasaun ne’ebé ita boot sira sei halo. No dalan ida tan, ikus liu hakarak repete dala ida tan katak la’os ona ita hahú partisipasaun maibé prestasaun, sé mak iha kapasidade hatudu prestasaun mak reprezenta Timor-Leste,” Sekretária Estadu Abrão nia motivasaun ba atleta sira hodi hakotu nia diskursu.
Iha parte sorin ba preparasaun ne’e, Vise Prezidente Comité Olímpico Nacional Timor-Leste (CONTL), Mateus da Cruz iha nia diskursu hatete, delegasaun ida ne’e boot ho nia kontijente hamutuk ema 85, ida ne’e nia dezafiu mos boot ba komité olímpiku atu presta servisu ba federasaun sira.
Vise Prezidente CONTL ne’e hato’o posibilidade delegasaun atleta Timor-Leste sei aranka ba vietnam entre dia 2 ou 10 de Maiu. Tuir oráriu Timor-Leste sei ba iha dia 10, maibé tanba ho preparasaun balun, nune’e delegasaun Timor-Leste husu atu aranka iha dia 2, tanba federasaun Futebol sei joga iha dia 6 de Maiu, technical meeting iha dia 5 de Maiu, maibé depende ba Komisaun Organizadora Sea Games nian ba delegasaun Timor-Leste.
“Fo hatene mos ba federasaun sira atu menyesuaikan tuir kalendáriu ne’ebé ita iha. Se karik ita ba iha dia 9, oinsá preparasaun kontinuasaun durante loron hitu iha Vietnam, tanba ida ne’e mak importante tebes ba Prezidente Federasaun sira, liu-liu delegasaun tomak, atleta, ofisial sira atu haree preparasaun, karik to’o persentajen hira, pois kontinua tan treinamentu iha Vietnam durante semana ida nia laran, atu kompleta imi nia treinamentu durante iha ne’e,” hatete Vise Prezidente CONTL ba atleta no afisial delegasaun kontijente Timor-Leste, iha nia diskursu.
Iha fatin hanesan atleta hosi modalidade Taekwondo Timor-Leste, Imbrolia Amorin, espresa nia sentimentu kontente hodi reprezenta Timor-Leste iha eventu ida ne’e.
“Bainhira atu partisipa iha Sea Games Vietnam tinan 2022, ha’u sente kontente, sente orgullu maibé nafatin mos preparasaun di’ak, atu nune’e hatudu jogu ne’ebé mak di’ak, atu nune’e hamorin Timor-Leste nia naran iha ema nia nasaun,” espresa Imbrolia.
Atleta Taekwondo ne’e la promete, maibé hakarak hatudu rezutaldu ne’ebé mak di’ak ba rai doben Timor, “ha’u la promete buat barak maibé ha’u iha esperansa katak bele hatudu jogu ne’ebé mak di’ak,” tenik Imbrolia.
Enkuantu Federasaun hitu ne’ebé sei partisipa iha Sea Games Vietnam 2022 mak, Federação Futebol Timor-Leste (FFTL) ho atleta 22, ofisiais lima, Federação Taekwondo Timor-Leste (FTTL) ho atleta 9, ofisiais 2, ho modalidade feto no mane, Federação Karate-Do de Timor-Leste (FEKATIL) ho atleta 5, ofisiais 1, Federação Halterofilismo, Cultura Fisíco e Peso de Timor-Leste (FHACUPTIL) ho atleta 4, ofisiais 2, Federação Nacional Natação de Timor-Leste (FNTL) ho atleta 3, ofisiais 1, Federação Boxe Amador Timor-Leste (FBATL) ho atleta 5, ofisiais 2, no Federação Timor-Leste de Atletismo (FTA) ho atleta 6, ofisiais 2.
