Reportajen Efrem Colo
Teknolojia Informação Comunicação TIC Timor (sigla portugues) hanesan instituisaun públiku, ofisialmente halo lansamentu ba website ID úniku, ne’ebé lansa hosi Ministru Prezidénsia Konsellu Ministrus, Fidelis Manuel Leite Magalhães hodi dezenvolve área setor informasaun no komunikasaun, inklui hafasil serbisu administrasaun publiku ba populasaun liuliu hafasil serbisu identifika identidade informasaun pesoál, Iha Novu Turizmu 03/03/2022.
Prezidente Konsellu Administrasaun, TIC Timor, I.P, Roberto Caetano de Sousa Vicente iha nia karta diskursu hateten, iha programa VIII Governu Konstitusionál liuhosi dekretu lei númeru 29/2017 iha 02 Agostu 2017, governu parte importante dezenvolve iha setór teknolojia informasaun no komunikasaun.
“Atu alkansa programa VIII Governu iha polítika reforma administrasaun públiku espesifikamente, ba esforsu Governu nian iha Governu eletróniku. TIC TIMOR hari’i iha VIII Governu Konstitusionál liuhosi dekretu lei númeru 29/2017 iha 02 Agostu 2017, no tutela iha Primeiru Ministru”.
Iha karta diskursu ne’e haktuir tan, TIC TIMOR bazeia ba rezolusaun Governu númeru 09/2020, 19 marsu 2020, simu papél ida atu lidera KTE(komisaun tekniku eventual) ho apoiu tékniku hosi diresaun jerál servisu rejistu iha notariádu, Ministériu Justisa ho MRLAP agora iha PCM. komposta hosi instituisaun Governu na’in-10.
Enkuantu iha esplikasaun livru TIC nian ID ÚNIKU(IDU) ne’e hanesan identidade dijitál hodi garante informasaun pesoál ka privadu ne’ebé iha base dadus eletroniku.
“ID ÚNIKU (IDU) maka konjunta uza dadus ida atu estabelese identidade dijitál ida ne’ebé atu asesu ba serbisu sira, liga ba sistema dadus sira seluk, hodi garante integridade úniku informasaun pesoal ka privadu. Ho nune’e nu’udar mós numeru dijitu koñesidu Numeru ID Úniku(NIM) ne’ebé uza atu identifika ema ida mesak ho informasaun ne’ebé rai iha baze dadus eletroniku.” Mensiona iha livru TIC.
Tanba ne’e identidade úniku sai mós hanesan rekezitu save ba implementasaun Governu eletróniku (output 1.5) hosi programa reforma administriva (2019-2023),
Ba programa website Identidade Úniku ne’e hetan apoiu hosi Orsamenetu Jeral Estadu 2022 ho montante millau $6 resin maibe aprova millaun $3 , ba orsamentu ne’e atu aloka ba material sira, hanesan (hardware no software) no mós rekrutamentu rekursu umanu hodi implementa projetu IDU ne’e.
