Reportajen Joselina dos Santos
Organizasaun Arte Marsiais Ikatan Keluarga Silat Putra Timor-Leste (IKS.PTL) Kera Sakti, Realiza eventu kampionato Nasionál ba da-uluk hafoin hetan reativasaun husi Governu iha tinan 2022 liuba. No iha eventu ne’e atleta hamutuk 120 maka partesipa, membru sira ne’e mai husi Sukursal Sanulu Resin Lima maka hanesan Sukursal Oecusi, Viqueque, Lautem, Covalima, Manufahi, Bobonaru, Baucau, Ainaro, Ermera, Aileu, Liquisa, Manatuto, Dili Leste, Dili Sentral no Dili Oeste.
Hafoin remata enventu, Presidente Komisaun organizadora Aniceito de Carvalho hateten, Objetivu husi Kompetisaun ne’e atu forma treinadór no atleta sira hodi kompete iha nivel Nasionál no mos iha sukursal. Nune’e bele kuda espiritu desportivu ambiente nian no promove atleta sira atu liuhusi área sidadania no espiritualidade.
“Objetivu husi kompetisaun ne’e atu forma treinadór IKS.PTL Kera Sakti iha área juri no wasit iha kompetisaun iha nivel Nasionál nomos sukursal, liuhosi desportivus iha kompetisaun Saùdavel. Aleinde mos esforsu atu promove atleta sira husi membru IKS.PTL Kera Sakti hodi hametin espiritu patriotismu no Nasionálismu modalidade desportu silat nian, hodi kontribui ba desemvovimentu Nasionál iha área desportu nian” dehan Presidente Komisaun Organizadora Aniceito de Carvalho, iha Salaun GMT, kinta 19/10.
Nia hatutan, atividade kompetisaun Kampionato Nasionál IKS.PTL CUP hetan apoiu fundus husi Ministéiru Joventude Desportivu Arte no kultura (MJDAC), ho montante dolar Amerikanu Rihun ruanulu resin walu atus lima sanulu resin rua.
Iha fatin, hanesan Prezidente IKS.PTL Kera Sakti, Silvestre Xavier Sufa hatutan, ohin hanesan loron dahuluk no primeira vez kampionato dahuluk ba IKS.PTL Kera Sakti desde IKS eziste iha Timor iha loron 15 fulan janeiru 1996. Foin primeira vez IKS.PTL tama iha faze kampionatu Nasionál, tanba durante ne’e buat barak mak dalaruma akontese entaun presiza tama ba sistema ida ne’ebé profesionalismu ba atleta nian nomos organizasaun Arte Marsiais nian.
Prezidente ne’e afirma, Planu ba kampionatu ne’e laos dala ida deit maibe sei kontinua ba etapa tuir mai no kampionatu ne’e mos hetan apoiu husi governu ne’ebé sai hanesan fundus prinsipal ba kompionatu ida ne’e.
Liu husi Diskursu Ministru Joventude Desportu Arte no Kultura (MJDAC) Nelyo Isaac Sarmento hateten, atividade ne’e hodi sai testamuña ba história IKS.PTL Kera Sakti iha Timor-Leste, tanba eventu ne’e sai hanesan 1° Kampionatu Nasionál iha Timor-Leste hodi nune’e bele hamosu atleta sira-nia prestasaun iha futuru.
“Ami hotu ohin presenza iha ne’e hakarak sai testamuña importante ba história IKS iha Timor-Leste, ami hakarak sai testamuña tanba ho eventu ida ne’e hanesan primeiru eventu Kompetisaun Nasiona IKS Timor-Leste, ho ida ne’e atu hamosu atleta ne’ebe iha prestasaun ohin loron ami orgullu ba sira-nia nia atividade” Nelio Deklara.
