Reportazen Francisco JDA
Centru Integradu Jestaun Krize (CIJK) liu hosi konferensia imprensa iha sala situasaun, hato’o mensajen ba públiku relasiona ho situasaun jerál ba surtu Covid-19 no oinsá atu responde periodu estadu de emergencia nia laran.
Tuir Segundu Komandante Operasional CIJK, Brigadeiro Jeneral Joao Miranda “Aluc Deskartes” hateten sura hosi loron 21 Marsu hafoin Timor-Leste hetan kazu Positivu ida no sa’e to’o 24 no Provavel 4 katak iha loron 24 Abríl, CIJK iha koordenasaun servisu ho Ministeriu Saúde no ekipa interministeriais liu-liu apoio profesionais saúde no hetan Kooperasaun di’ak tebes iha territóriu Timor laran tomak.
“Esforsu no susesu ida ne’e rezista istoria iha ita nia nasaun katak rezisté para manan. Ohin ita deklara ho susesu katak ita hakat liu faze dahuluk luta kontra Covid-19 iha Timor Leste ho susesu maske nune’e tuir peritu sira nia analize no informasaun Organizasaun Mundiál Saude ( OMS) fo sai katak surtu ida ne’e seidauk lakon iha mundu. Ne’e duni tenki organiza an no preparadu liu tan atu hasoru iha ondas daruak hanesan Pais sira seluk hato’o”, tenik Segundu Komandante Operasional CIJK iha CCD,20/05.
Brigadeiro Jeneral Joao Miranda reforsa tan CIJK avalia hela dadaun servisu ne’ebé presta ona durante besik fulan rua no sei submete ba Komando Operasional no interministeriais hodi tetu no deside espasu sira tuir mai hafoin estadu emergencia dala rua.
