Home Notisia PR Lu-Olo: Deputadu Sira Labele Hamosu, Depropózitu, Obstákulu ba Normal...

PR Lu-Olo: Deputadu Sira Labele Hamosu, Depropózitu, Obstákulu ba Normal Funsionamentu PN

474
0
Prezidente Republika, Francisco Guterres Lu-Olo (Foto: Interlusofona)

Reportajen Santina LDA

Prezidente Republika, Francisco Guterres Lu-Olo, hato’o iha nia diskursu ba Loron Restaurasaun Independensia, 20 Maiu, kona ba importansia hosi funsionamentu normal Parlamentu Nasional no husu atu la hamosu violensia.

“Deputadu sira labele hamosu,  depropózitu, situasaun ida ne’ebé bele sai fali obstákulu ba normal funsionamentu Parlamentu Nasionál nian. Sira mós labele hamosu situasaun ho objetivu atu provoka krize institusionál atu dudu hodi kbiit Prezidente Repúblika atu disolve Parlamentu Nasional no konvoka Eleisaun Antesipada.” Presidente Lu-Olo hato’o iha nia diskursu, 20/05, iha Palasiu Prezidente, Aitarak Laran, Dili.

“Deputadu sira iha Parlamentu Nasional reprezenta povu tomak. Sira-nia devér maka buka kontribui didi’ak ba funsaun lejislativa, fiskalizasaun no desizaun polítika ne’ebé Konstituisaun Repúblika haruka,” Hatutan Lu-Olo.

Prezidente Republika mos hatete katak, “Ita labele tolera uza violénsia, verbal ka fiziku, husi deputadu balun iha Parlamentu Nasional.”

Dehan mos katak krize institusional ne’e  hetan solusaun bainhira partidu sira  kontribui ho laran luak no moos ba  funsionamentu Parlamentu Nasional nian tuir  prinsípiu no regra demokrátika sira ne’ebé  desizaun bazeia ba maioria no mós sira-nia  reprezentatividade noproporsionalidade. 

Prezidente ne’e mos hatete katak sei hala’o nafatin diálogu ho partidu polítiku sira ho asentu parlamentar hodi  garante demokrasia, governabilidade, páz no estabilidade  iha ita-nia rain, iha momentu ne’ebé de’it. Atu garante valór no prinsípiu sira ne’e,  órgaun soberanu sira no ita hotu tenke respeita Konstituisaun no lei sira ne’ebé vigora.

LEAVE A REPLY

Please enter your comment!
Please enter your name here