Reportajen David da Costa
Autoridade Protesaun sivil (APC), Rekoila ona Dadus Vitima sira ne’ebe afetadu ba dezastre naturais iha Inisiu Fulan Jullu ne’e hamutuk Uma Kain 653 ne’ebe afetadu ba Inundasaun ne’ebe kauza husi Udan Bo’ot foin lalais ne’e iha Munisipiu Sanulu resin ida no ema nain ida mota lori iha Munisipiu Lautem ne’e seidauk hetan to’o Agora
Diretór Gabinete Relasaun Externa no Komunikasaun, Autoridade Protesaun sivil (APC), Anacleto Caetano, hateten, Vitima sira ne’e hetan hotu ona Apoiu emerjensia husi APC ho ekipa sira iha Munisipiu, no dadaun ne’e kontinua hala’o hela levantamentu dadus ba uma ne’ebé hetan estragus total, nune’e bele identifika hodi hein Prosesu apoiu rekoperasaun ba vitima sira nia hela fatin.
No Dadus ne’ebe ekipa APC sira Rekoila iha terenu, uma Komunidade nian ne’ebé hetan estragus total husi Inundasaun hamutuk 264, ne’ebé tama iha kategoria atu hetan apoiu Rekoperasaun. Vitima sira ne’ebe hela fatin hetan estragus naton hamutuk 159, no A’at kaman Hamutuk 366.
Tanbe ne’e Vitima sira ne’ebe afetadu ne’e APC sei apoiu deit tuir Kriteira ne’ebé hatur ona iha APC Konaba apoiu rekoperasaun nian, maibé ba apoiu emerjensia nian Vitima hotu-hotu iha direitu atu hetan apoiu aihan, maibé ba apoiu rekoperasaun depende ba tipu dezastre ne’ebé iha hanesan uma A’at total, A’at Naton no A’at Kaman.
“Apoiu emerjensia ita fó tiha ona, maibé agora ekipa sira tun ba terenu hodi halo reverifikasaun ba uma ne’ebé hetan estragus total nune’e ita bele konsidera tama iha kategoria Rekoperasaun ga lae,” dehan Diretór Gabinete Relasaun Externa no Komunikasaun-APC, Anacleto Caetano, liuhusi konferensia Imprensa iha edifisiu APC kaikoli, Segunda 10/07.
Nia esplika, Vitima sira ne’ebé uma hetan estragus total sei hetan apoiu rekoperasaun ba hela fatin ho total orsamento rihun Ida (1 mil) inkliu pakote ekipamentus hanesan Ai, Kalen no Bessi. Maibé Vitima sira ne’ebe uma hetan estragus naton sei hetan Apoiu rekoperasaun ho total orsamento hamtuk Atus neen ($600 Dolar Americano), inkliu pakote ekipamentus Kontrusaun tuir tipu ne’ebe iha. No Vitima sira ne’ebé uma hela fatin A’at Kaman hanesan bee tama sei la hetan Apoiu Orsamento maibé sira iha direiru hetan apoiu emerjensia hanesan Aihan nesesidade bazika no laos Aihan.
“Tuir dekretu lei Numeru 7/2021 Hateten klaru sira ne’ebé uma hetan estragus total ne’e bele hetan apoiu rekoperasaun no sira ne’ebe A’at Kaman hanesan bee tama ne’e hetan deit apoiu emergencia,” Nia Deklara.
Tuir Dadus ne’ebe APC Rekoila husi Janeiru tinan ne’e to’o Jullu, APC rejista Vitima hamtuk rihun Ida resin , no Dadus ne’ebe Kategoria atu Apoiu Rekoperasaun ne’e hamtuk uma 789 mak tama iha kategoria rekoperasaun.
Maibé Konaba sidadaun ne’ebé mota lori iha Munisipiu Lautem, Autoridade Protesaun Sivil Komfirma katak Dadaun ne’e ekipa sira servisu hamtuk ho PNTL, Bombeirus no Autoridade no Komunidade sira kontinua Buka tuir Sidadaun ne’e.
Husi Akontesementu Dezastre Naturais husi Munisipiu 11, Hanesan Munisipiu Ainaro, Baucau, Bobonaro, Covalima, Ermera, Dili, Lautem, Manatuto Manufahi, Oekusse no Viqueque ne’e Autoridade protesaun Sivil sira iha kada Munisipiu apoiu hotu ona emerjensia ba Vitima sira, no iha suku balun seidauk apoiu emerjensia tanba Kondisaun estrada ladiak hodi transporta sasan hanesan Aihan no la’os Aihan.
