Reportajen Filomena da Conceição
Professores kontartadu husi Munisipiu Dili nain 250 ne’ebé asina ona kontratu ho Ministeiru Edukasaun iha fulan abril, besik ona fulan haat ona maibé Manorin kontratadu sira seidauk simu osan, tanba ne’e sira husu ba Governu ida agora atu haree ba problema refere.
Portavoz Professores Kontratadu, Agostinho da Costa Belo, hateten, Professores ne’ebé asina kontratu iha fulan Abríl ne’e husi Munisipiu Dili hamutuk 250, maibé besik ona fulan haat professores kontratadu sira ne’e seidauk hetan nia direitu, tanba ne’e husu ba Governu, liuliu ba Ministériu Edukasaun ne’ebé lidera husi Dulce de Jesus Soares, atu prosese professores kontratadu nia salariu.
“Ami husi professores ne’ebé asina kontratu iha fualan Abríl, tina 2023, katak kuaze tama ona fulan 4 maibé ami-nia salariu seidauk simu, tanba ne’e ami husu ba primeiru Ministru no Ministra Edukasaun atu prosesa ami nia saláriu, tanba ami hotu kontribui no forma ona jerasaun foun, liuhusi Edukasaun formal iha tempu barak nia laran no la sente kolen maibé laiha saláriu,” dehan portavoz Professores Kontratadu Agostinho da Costa Belo, iha konferénsia Imprensa, Largo Lecidere, segunda 10/07.
Nia haktuir, hanesan ema umanu, nesesidade loron -loron presiza tebes saláriu tanba liuhusi saláriu ne’e, bele ajuda sira hodi hetan paun fuan ida no kafé kopu ida, molok atu atu ba eskola hodi forma jerasaun foun sira ba futuru nasaun RDTL nian.
“Husu mós ba Ministériu Edukasaun, Ami nia maluk profesóres reklamante ne’ebé to’o oras ne’e seidauk públika naran, tanba ne’e nia parte hato’o ba Ministériu Edukasaun hodi lidera nia ekipa hotu, atu públika ona sira-nia naran hodi profesores reklamante sira mós bele hetan sira-nia direitu,” nia husu.
Maibé karik Ministériu Edukasaun la hatan ba sira nia ejizénsia ne’e, iha semana ida nia laran, professores kontratadu sira sei kontinua marka audiénsia ho Ministra da Edukasaun, Primeiru Ministru no ba komisaun G ne’ebé iha Parlamentu Nasionál.
Enkuantu profesores sira iha territóriu Timor laran ne’ebé asina ona Kontrantu iha fulan Abríl hamutuk 1,500 no iha Munisípiu Díli hamutuk 250 profesóres.
