Reportajen Adroaldo “Saretukau”
Organizsaun Mundial Saúde (OMS) hamutuk ho Ministériu Saúde (MS) sexta-feira ne’e (28/07), iha edifísiu OMS, Caicoli, ho haksolok anúnsia ba públiku ba esforsu sira mak halo hodi kombate no prevene moras Rubella, ikus Timor-Leste elimina kazu refere.
“Ha’u hamriik iha imi-nia oin ho orgullu no laran haksolok tebes hodi selebra atinjimentu boot ida iha Timor-Leste nia viajen saúde publika. Hanesan ita hotu hatene, semana kotuk, Gabinete Rejional Organizasaun Mundial Saude nian iha Sudeste Aziatiku, anunsia katak Timor-Leste ho susesu halakon ona moras Rubella no kontinua mantein eliminasaun sarampu.” Dehan Dr. Arvind Mathur hosi OMS Timor-Leste.
Nia dehan, ida ne’e hanesan atijimentu signifikativu ida iha luta hasoru moras ne’ebé bele prevene ho vasina no sasin ida kona-ba esforsu ne’ebé governu halo, liu-liu Ministeriu Saúde, pesoál saúde sira, voluntáriu sira, parseiru sira no komunidade tomak.
“Rubella mak moras ida-ne’ebé kontagiozu tebes ne’ebé bele kauza moras grave no defisiénsia moris ne’ebé iha bebé foin moris karik inan ne’e hetan virus durante isin-rua. Maibe, liuhusi esforsu ba vasinasaun nian no ho dedikasaun pesoal saude sira nian, Timor-Leste konsege jere hodi elimina ona risku moras ida ne’e.”
Dr.Arvind akresenta, atu alkansa eliminasaun ne’e, Timor-Leste halo interrupsaun ba transmisaun endemiku ba virus rubela durante fulan 36 liu. Nia dehah, “vasina sira ne’e importante tebes atu proteje saúde publika. Vasinasaun la’ós de’it proteje ita nia oan sira husi moras debilitasaun sira ne’e maibé mós kontribui ba imunidade jerál komunidade nian.”
Timor-Leste nia atinjimentu ne’e reflete kompromisu koletivu ba imunizasaun no hasa’e asesu ba servisu imunizasaun ba povu iha nasaun ne’e. Maske nune’e, Timor-Leste atinji ona alvu ida-ne’e ho imunizasaun rutina ba vasinasaun sarampu-rubela hamutuk ho kampaña regulár ba vasinasaun Sarampu no Rubella, kuaze kada tinan tolu ho kustu no esforsu boot, nia deha.
“Atu mantein atinjimentu ida ne’e Timor-Leste tenke atinji no mantein liu 95% kobertura vasina rutina iha munisípiu hotu-hotu no ita tenke matan-moris nafatin iha ita-nia esforsu atu proteje populasaun vulneravel sira.”
Iha fatin hanesan Timor Leste nia Komisaun Nasional Verifikasaun Sarampu no Rubella Dra. Milena dos Santos hatete, moras ida ne’e tenki vasina labarik sira idade fulan 9 to’o idade 18. Moras ida ne’e perigu liu ba ba inan isin-rua sira bainhira iha primeiru trimestre bele afeita ba feitus ka janin iha inan nia kabun laran ne’ebé seidauk dezenvolve sai ba bebe.
“Nia bele kauza sindroma kontinentais Rubella, sindroma ne’ebé mosu no afeita ba oan ne’ebé foin moris ne’e bele mosu iha problema fuan fraku no efeitu ba tilun tanba ne’e apelu ba komunidade tomak tenki lori nafatin oan sira ba vasina moras Rubella ne’e prevene hosi vasinasaun no moos sai hanesan papel importante tebes atu kontrola no proteje populasaun ne’ebé vulnerável.”
