Reportajen Umbelina dos Reis
Relasiona ho Timor-Leste nia eliminasaun ba moras Rubella, Timor Leste nia Komisaun Nasional Verifikasaun Sarampu no Rubella Dra. Milena dos Santos husu nafatin ba populasaun tenki lori nafatin labarik ba vasina atu nune’e hodi prevene no nafatin kombate moras refere iha ita nia rai.
Doutora ne’e hatete, moras ida ne’e tenki vasina labarik sira idade fulan 9 to’o idade 18. Moras ida ne’e perigu liu ba ba inan isin-rua sira bainhira iha primeiru trimestre bele afeita ba feitus ka janin iha inan nia kabun laran ne’ebé seidauk dezenvolve sai ba bebe.
“Nia bele kauza sindroma kontinentais Rubella, sindroma ne’ebé mosu no afeita ba oan ne’ebé foin moris ne’e bele mosu iha problema fuan fraku no efeitu ba tilun tanba ne’e apelu ba komunidade tomak tenki lori nafatin oan sira ba vasina moras Rubella ne’e prevene hosi vasinasaun no moos sai hanesan papel importante tebes atu kontrola no proteje populasaun ne’ebé vulnerável.”
Doutor Mariano da Silva Marques hosi Ministériu Saúde, hatete, relasiona ho moras Rubella ne’e, iha tinan 2015 to’o 2019 sira halo ona kampaña hodi halo eliminasaun ba moras refere, ida ne’e la’os fasil, maibé presija halp hosi Ministériu Saúde maibé hosi abilidade no sistema ne’ebé di’ak hodi elimina.
“Oinsá fasilita no kontrola nafatin moras Rubella ne’e para labele akontese iha ita nia rai, Ministériu Saúde kontinua alerta ba komunidade hodi halo kobertura ba ezaminasaun moras Rubella nian tanba ezaminasaun 95% entaun ita presija tebes sistema vijilansia ne’ebé forte.”
Entre tantu Dr. Arvind Mathur, Reprezentante OMS ba Timor-Leste, dehan, eliminasaun moras Rubella iha Timor-Leste, ida ne’e hanesan atijimentu signifikativu ida iha luta hasoru moras ne’ebé bele prevene ho vasina no sasin ida kona-ba esforsu ne’ebé governu halo, liu-liu Ministeriu Saúde, pesoál saúde sira, voluntáriu sira, parseiru sira no komunidade tomak.
“Rubella mak moras ida-ne’ebé kontagiozu tebes ne’ebé bele kauza moras grave no defisiénsia moris ne’ebé iha bebé foin moris karik inan ne’e hetan virus durante isin-rua. Maibe, liuhusi esforsu ba vasinasaun nian no ho dedikasaun pesoal saude sira nian, Timor-Leste konsege jere hodi elimina ona risku moras ida ne’e.”
Dr.Arvind akresenta, atu alkansa eliminasaun ne’e, Timor-Leste halo interrupsaun ba transmisaun endemiku ba virus rubela durante fulan 36 liu. Nia dehah, “vasina sira ne’e importante tebes atu proteje saúde publika. Vasinasaun la’ós de’it proteje ita nia oan sira husi moras debilitasaun sira ne’e maibé mós kontribui ba imunidade jerál komunidade nian.”
