Reportajen Joselina dos Santos
Iha loron marsa diversidade Komunidade Lesbian, Gay, Biseksual ho Transgender Intersex (LGBTI), iha Timor-Leste husu sosiedade tenke simu sira-nia prezensa, bainhira iha membru família ida moris mai ho kondisaun hanesan ema LGBTI atu labele halo diskriminasaun tanba sira iha direitu hanesan atu asesu ba setór oin-oin hanesan edukasaun, ekonomia no saúde.
Iha marsa diversidade, Komunidade LGBTI, Ismael Ribeiro ba Neon Metin hatete, ohin hanesan atividade importante primeiru iha governu da-sia husi Primeiru Ministru Kay Rala Xanana Gusmão, nune’e komunidade LGBTI hatudu ba governu da-sia oinsa sira-nia ezistensia Timor-Leste.
“Atividade ne’e apoiu husi Uniaun Europeia, LGBT+Q, Plan Internasional nomos Peskizadór sira. Entaun importante tebes tanba komunidade LGBTI tama ona iha intelektual oinsá bele hatene sira-nia maneira moris loron-loron iha sira-nia familia”, dehan Ismael Ribeiro iha marsa diversidade iha Pantai-Kelapa, 28/07.
Nia hatutan, informasaun kona-ba komunidade LGBTI ne’e sira to’o ona iha autoridade komunitaria sira, atu sosiedade labele halo diskriminasaun ba komunidade LGBTI sira, maibe tanba komunidade sira falta informasaun no la inklui ho kolega sira entaun sira halo buat ne’ebe família ladun gosta, nune’e sira sei esforsu atu labele hamosu diskriminasaun iha sosiedade nomos iha familia uma laran.
“Husu sosiedade tenke simu bainhira sira-nia membru família ida mai hanesan komunidade LGBTI labele halo diskriminasaun, tanba moris hahú husi kiik sira-nia sentimentu hanesan ema LGBTI, ita labele halo Psikolojikamente ba nia maibe fó nia edukasaun no livre atu bele moris“, nia informa.
Entaun ema haree bandeira ne’e hanoin mane ho mane hola malu no feto ho feto hola malu, maibe ne’e buat ne’ebe normal iha nasaun ida ne’e, nune’e Timor-Leste sira luta maka’as atu familia bele simu realidade, karik iha familia ka paseiru ruma mak hanesan tenke sura mos ho sira.
