Reportajen Joselina dos Santos
Peskizadora Organizasaun Coalition For Diversity And Action (CODIVA) iha Timor-Leste no dosente Universidade Nasional Timor Lorosa’e, Faculdade Ciências Sociais (UNTL-FCS), Lili Chen sei kontinua fahe informasaun ba públiku nomós estudante sira kona-ba komunidade LGBTI+Q atu labele haree ba kór, rasa, kultura no relijiaun, maske Timor-Leste adopta sistema patriarkal maibe tenke konsidera komunidade LGBTI+Q hanesan mós ema umanu tanba sira iha direitu hanesan atu asesu ba saida de’it.
“Ohin ita halo atividade marsa diversidade, entaun ne’e eventu ne’ebe importante atu hatudu ita nia aan la haree ba kór, rasa, relijiaun. Ami hakarak fó apoiu ba komunidade LGBTI iha Timor-Leste, tanba sira mos nu’udar ema umanu ne’ebe iha direitu hanesan, realidade iha terenu ema sempre uza razaun hanesan kultura no relijiaun atu esklui sira, entaun ita presiza fó apoiu ba komunidade LGBTI atu sira mos hetan direitu hanesan”, dehan, Peskizadora Codiva iha Timor-Leste, Lili Chen iha Marsa diversidade, Pantai-Kelapa, 28/07.
Peskizadora ne’e hatutan, Timor-Leste hanesan sosiedade patriarkal entaun sira haree ba mane nia posizaun importante liu kompara ho feto entaun igualdade jéneru ne’e fahe ba feto, maibé la fó espasu ba ema ne’ebe jéneru non-jéneru sira. Ne’e duni presiza fó hatene ba públiku atu bele hatene kona-ba jéneru inkluzivu atu bele konsidera komunidade LGBTI.
“Relasiona ba marsa diversidade ne’e, husu ba públiku atu labele halo diskriminasaun ba komunidade LGBTI, tanba sira iha direitu atu asesu ba setór oin-oin” nia informa.
