Reportajen Joselina dos Santos
Ministério Juventude Desporto Arte e Cultura (MJDAC), liuhosi Komisaun Reguladora Arte Marsiais (KRAM) realiza seremonia entrega motorizadas hamutuk 12, laptot 10, printer 1 no scanner 1 ba sekretariadu nasionál KRAM no estrutura sub-KRAM Nivel Munisipiu inklui RAEOA atu asegura servisu KRAM nian iha nasional to’o Munisipiu hodi kontrola fiskaliza no superviziona atividade KRAM nian.
Iha Diskursu, MJDAC, Nelio Isac Sarmento hateten, ekipamentu hirak ne’e paz parte ida atu reforsa no responde ba preokupasaun públiku nian ba iha atividade arte marsial nian, dadaun ne’e iha ona faze suspensaun iha IX Governu nian no komesa haree ona ema grupu voluntariu liu-liu ba instituisaun estadu sira atu servi estadu no servi povu hodi hakribi violénsia. Espera katak neik-neik bele sente atu haluha violénsia iha Timor-Leste hodi haree ba nasaun nia futuru.
“KRAM no Sub-KRAM sira iha pápel importante atu sai hanesan ponte ida entre estadu ho sosiedade hodi ajuda rezolve problema hirak ne’ebé iha indikasoens envolve grupu arte marsial. Klaru katak meius hirak ne’e halo netik buat ruma ba nasaun duké ita laiha. Ita iha informasaun barak tanba grupu entre grupu ne’ebé nafatin kontra no hadomi violensia. Nune’e ita iha obrigasaun tenke informa ba komunidade autoridade no parte seguransa atu haree ba atividade sira ne’ebé lakoi hatudu-an maibe hakarak subar malu”, dehan Nelyo Isacc Sarmento iha edifisiu MJDAC, 16/05.
Nia haktuir, la tempu ona subar malu hodi halo violensia, Timor-Leste país demokratiku legal, nune’e brani hatudu-aan atu públiku hatene labele subar malu iha kotuk. Ho ida ne’e mak KRAM no Sub-KRAM iha responsabilidade boot hodi fó hanoin atu hakalma konflitu ne’ebé akontese iha suku no bairo laran. husu ba sub-KRAM uza ekipamentu hirak ne’e ho diak no neik-neik sei hamenus violensia iha TL, KRAM mosu atu tau matan ba preokupasaun nasaun nian liuhosi atividade arte marsial ne’ebé laiha responsabilidade no la tuir doutrina ne’ebé eziste.
Iha fatin hanrsan Prezidente KRAM Octávio da Conceição, hatutan, Ohin MJDAC liuhosi Komisaun Reguladora Arte Marsiais (KRAM) realiza seremonia entrega motorizada no komputador ba funsiunariu KRAM nian nomos estrutura Sub-KRAM sira iha Munisipiu sanulu resin-rua inklui RAEOA atu asegura servisu KRAM nian iha nasional to’o munisipiu. Material sira ne’ebé ohin entrega ba estrutura sira ne’e seidauk to’o maibe naton ona hodi bele halo servisu no atendementu ba interese Organizasaun Arte Marsiais nian nomos ba joven sira.
