Reportajen Joselina dos Santos
Komisaun Nasionál Eleisaun (CNE), sei iha 72 oras hamutuk ho Komisáriu ho interesante sira, liu-liu parte ekipa no fiskais, hodi halo reklamasaun kona-ba prosesu tomak ne’ebe la’o hela. Karik la akontese reklamasaun ruma, CNE ofisialmente sei submete rezultadu ba Tribunal Rekursu (TR), hodi bele fo sai rezultadu final. Tanba ne’e fo hatene ba públiku katak, rezultadu ne’ebe iha halo deit ba Sentru Votasaun sira ne’ebe iha rai laran inklui Australia.
Liu husi konferénsia imprensa Prezidente CNE, Jose Agustinho Belo hato’o ba públiku ofisiálmente liu-liu kona-ba prosesu apuramentu ne’ebe mak la’o ona iha 72 oras, tanba ema hotu hatene katak depois de eleisaun iha loron 19 Marsu 2022 halo kedas kontajen iha Centru Votasaun, depois iha nivél munisipiu, nune’e tuir lei rezultadu tomak tenke lori mai CNE atu halo apuramentu nasionál.
“Materia ne’ebe importante atu halo apuramentu nasionál mak votu reklamadu, no votu nulu ne’ebe durante ne’e hato’o mai iha CNE, para liu husi plenaria Komisaun hamutuk ho tékniku, atu halo apuramentu nasional, husi votu nulu depois ita halo verifikasaun ho intensivu verifika ho di’ak no rezultadu ita hato’o mos ba fiskais sira kona-ba ida-idak nia votu ,” dehan Prezidente CNE Jose Agustinho Belo, ba Jornalista sira iha Salaun CNE Kolmera, 25/03.
Nia dehan depois konfirmasaun ida ne’e katak, iha votu válidu ba kandidatu husi numeru 1 to’o 16, iha mos votus reklamadu sira depois sira haree balu mantein nafatin reklamadu, no balu sai válidu. Prosesu tomak sira halo to’o 72 oras no sira kumpre lei, ohin termina ona apuramentu nasional.
“Tuir lei ita sei iha 72 oras atu CNE hamutuk Komisariu no tékniku sira sei elabora akta final atu bele taka sai iha Edifisiu CNE, no mos fo tempu ba interesante sira liu-liu parte ekipa no fiskais sira hodi halo reklamasaun kona-ba prosesu tomak ne’ebe la’o iha dalan atu hato’o. Karik la akontese reklamasaun ruma CNE sei submete ofisialmente ba tribunal rekursu rezultadu ne’ebe iha. Tanba ne’e fo hatene ba públiku katak rezultadu ne’ebe iha halo deit ba Sentru Votasaun sira ne’ebe iha rai laran inklui mos Australia,” dehan Prezidente CNE
Prezidente haktuir hanesan iha Portugal, Korea, Inglaterra ho Irlanda seidauk bele halo apuramentu tanba legal ne’e ultrapasa ona, karik rezultadu sira ne’ebe fo mai, ami apura deit rezultadu ne’ebe Sentru Votasaun no akta orijinál sira ne’ebe lori mai ida ne’e mak sei halo atu, nune’e públiku bele komprende no hatene prosesu tuir mai. Espera katak serbisu ne’ebe ita la’o hamutuk husi media hatudu duni komportamentu no serbisu ne’ebe diak no hasa’e nafatin kualidade eleisaun ne’ebe Timor oan hakarak no ba Timor nian diak.
