Reportajen Adroaldo “Saretukau”
“Iha loron ne’e keta haluha, apresia o nia aan, halo buat ne’ebé o gosta, hakerek iha o nia diáriu konabá sentimentu hirak ne’ebé o labele espresa sai, sai belun ba o nia aan, pasa tempu ho natureza no halo ezersísiu.” Grupu RONA.
Grupu RONA (Rona O-Nia Aan) selebra loron internasional Saúde Mental ne’ebé monu iha loron 10 fulan Outubru ho hato’o mensajen ba ema hirak mak hasoru problema ho saúde mental iha sira nia moris, atu sira nafatin iha korajen hodi hasoru situasaun difisil sira, wainhira ita nia hanoin saudável, ita nia isin mos saudável.
Kordenadora Grupu RONA, Noviyanti Carly Tilman Leite, hato’o ksolok loron internasional Saúde Mental ba ita hotu, no nia espera loron ida ohin sai hanesan loron ida ne’ebé bele hafanun fali ita hotu katak, ita nia saúde mental importante hanesan mos ita nia saúde fíziku.
“Nune’e ha’u nia mensajen ba maluk sira ne’ebé agora da-dauk iha situasaun difisil nia laran ou sofre hela problema mental hanesan stress, depresaun, ansiedade ka atakasaun pániku, atu labele ta’uk husu ajuda ba profisional saúde mental sira ne’ebé besik ou ba ema ne’ebé imi fiar.” Kordenadora Noviyanti nia mensajen iha selebrasaun loron internasional Saúde Mental, 10/10.
Nia hatete, wainhira hasoru problema saúde mental atu nafatin “halo aktividade ne’ebé imi gosta hanesan ezersísiu, meditasaun, pasa tempu ho natureza, pasa tempu ho família ou ho ema ou ema sira ne’ebé imi sente seguru.”
Hosi loron ne’e, Grupu RONA hakarak hato’o mesajen pozitivu sira atu ema ida-idak bele iha korajen nafatin hodi hasoru problema mental mak sira hasoru hanesan stress, depresaun, ansiedade ka atakasaun pániku.
Mensajen enkorajamentu hosi membru grupu RONA mak, halo buat ne’ebé halo o kontente, keta haluha sai belun di’ak ba o nian aan rasik, faillansu la signifika falla iha ita nia moris, maibé faillansu ne’ebé ita hetan sai hanesan lisaun ba ita nia moris, ita presiza haku’ak no hadomi ita nia aan antes hadomi ema seluk, tenki fiar o nia aan, apresia o nian aan, ita mos presiza pasénsia, tanba buat hotu presiza tempu, apresia o nia aan katak o úniku, labele ta’uk atu hasoru problema tanba situasaun difisil hotu o hasoru sei pasa, no buat hotu sei di’ak.
