Home Saude Grupu RONA Organiza Treinamentu Importánsia Hosi Saúde Mental ba Estudante Eskola Sekundária...

Grupu RONA Organiza Treinamentu Importánsia Hosi Saúde Mental ba Estudante Eskola Sekundária 7 Iha Dili

1054
0
Grupu RONA hasai foto hamutuk ho Public Diplomacy Director Embaixada Amerika, Reprezentante hosi Ministériu Edukasaun, Uma America no estudante sira no manorin sira.[Foto: Adro | 11.10.2023]

Reportajen Adroaldo “Saretukau”

Grupu RONA (Rona O-Nia Aan) organiza treinamentu saúde mental ho tema “Ita nia Saúde Mental, importante mos hanesan ita nia Saúde Fíziku” ba estudante no manorin na’in hosi Eskola Sekundária Públiku no Privada 7 iha Dili.

Kordenadora Grupu RONA, Noviyanti Carly Tilman Leite hatete, treinamentu ne’e hodi hasa’e konsiénsia no haburas koñesimentu estudante no manorin na’in konabá saúde mental.

“Objetivu atu hasa’e sira-nia kuñesimentu no konsiénsia kona-ba problema saúde mental iha eskola hodi promove moris saudável ne’ebé livre husi estress (hanoin barak), atu buka no hetan tratamentu no akonsellamentu wainhira esperiénsia moras mental, halo prevensaun ba oho-aan, hasa’e no dezenvolve estudante, manorin, no joven sira-nia koñesimentu literasia kona-ba saúde mental.” Dehan Kordenadora Noviyanti iha nia diskursu abertura, iha Salaun Ian Martin, INFORDEPE, 22/09.

Nia hatete, aktividade ida ne’e hanesan nia mehi naruk ida ne’ebé hakarak tebes realiza, nune’e hafoin hetan oportunidade hosi programa interkambiu Young Southeast Asia Leaders Initiative (YSEALI) iha Estadus Unidus Amérika, ikus mai realiza duni.

“Nune’e hafoin ha’u fila husi ha’u nia estudu, ha’u iha mehi boot ida oinsá mak bele hasa’e konsiénsia no fahe koñesimentu ba iha komunidade kona-ba Saúde Mental, tanba ema barak mak tau importansia liu ba iha saúde fíziku no haluha tiha katak sira nia saude mental  bele mos fo impaktu ba iha sira-nia  saúde fíziku se wainhira sira lahatene oinsá mak jere sira nia emosaun iha situasaun difisil ou estress ruma.”

Nia salienta tan, iha nia estudu mos, nia hasoru kolega barak ne’ebé mak sofre moras mental, nia dehan, dala ruma situasaun hirak ne’e halo ema la brani hatete sai tanba ta’uk sosiedade julga sira.

“Ne’e mak ha’u hanoin katak wainhira ha’u fila-fali mai Timor-Leste, ha’u presiza halo buat ruma, ha’u presiza hasa’e konsiénsia no haburas koñesimentu juventude nian, komunidade nian konabá saúde mental, ho ida ne’e ohin loron ita hamutuk hodi realiza mehi ne’ebé mak ha’u iha.”

Nia agradese ba estudante no manorin na’in sira ne’ebé mak hola parte ona iha treinamentu ida ne’e no hanesan suporta ida hodi halo aktividade ne’e sai susesu, no espera bele fahe tutan saída mak sira hetan. “Ami espera aktividade ne’e la hotu de’it ho alin sira iha ne’e, maibé sei hatutan fali ba família nomos komunidade ne’ebé mak imi hela ba.”

Iha parte sorin ba aktividade ne’e, Public Diplomacy Director, Embaixada Amérika iha Dili, Diana Braunschweig impresionadu tebes ho Timor-oan sira nia talentu no komitmentu liu-liu ba joven sira ne’ebé kontribui ona durante ne’e. Ba mos alumni programa interkambiu no programa seluk hosi Estadus Unidus nian ne’ebé kontribui ona ba sira nia sosiedade.

Diana hakarak agradese ba mestre sira ne’ebé mak apoia ona projetu ida ne’e, ba estudante sira mak kolabora iha projetu ida ne’e, liu-liu hakarak hato’o parabéns ba YSEALI alumna, Kordenadora Grupu RONA, ne’ebé mak organiza ona eventu importante ida ne’e.

“Asuntu saúde mental ne’e hetan obstákulu tebes atu halo diskusaun, tanba konsidera hanesan taboo, ba hirak ne’ebé sofre problema mental ne’e, nia impaktu tebes ba individual sira sira nia moris di’ak, no sosiedade nia produtividade.”

Aktividade ne’e partisipa hosi estudante no manorin na’in eskola públiku no provada hamutuk 40 hanesan, eskola 4 de Setembru, Nobel da Paz, Paulo VI, CANOSSA, Amigos de Jesus, São Pedro no 12 de Novembru iha Salaun Ian Martin, INFORDEPE, Balide, Dili.

Print Friendly, PDF & Email

LEAVE A REPLY

Please enter your comment!
Please enter your name here