Home Notisia Proteje Feto no Ema Vulneravel, Lu Olo: Violensia Hasoru Feto Labele Akontesetan

Proteje Feto no Ema Vulneravel, Lu Olo: Violensia Hasoru Feto Labele Akontesetan

425
0
Simblo Kampanna Hapara Violensia Hasoru Feto no Labarik

Reportazen Zevonia Vieira

“Ha’ u fiar katak autoridade relevante sira sei hola medida efetivu liután, hodi proteje feto no ema vulnerável sira iha ita-nia sosiedade. Ha’u apela ba komunidade rasik atu hametin vijilánsia hodi proteje malu no nune taka dalan ba krime ne’ ebé de’it iha ida-idak nia área hela-fatin. Husi sorin seluk, ita presiza tebtebes uza teknolojia foun atu aprende buat di’ak, la’ós halo asédiu seksual, liuhusi ezibisaun pornográfika ba ita-nia inan no feton sira”. Prezidente Republika.

Loron 3 Novembru nudar loron importante ba feto Timor-Leste, ne’ebe hatudu ona sira nia valor liu hosi kontribuisaun, hahu hosi luta ba ukun rasik-an to’o ohin loron.

Liu hosi diskuru ofisial ba selebrasaun loron Nasionál Feto Timor-Leste, Prezidente Republika, Dr. Francisco Guterres Lu Olo hateten  loron Nasionál Feto Timor-Leste mak loron ne’ebé feto rurál ida, nu’udar kombatente libertasaun nasionál, barani reziste ho kilat iha liman to’o mate. Ninia barani, foufoun kedas, iha ita-nia luta libertasaun nasionál, loke neon ba kombatente hotu-hotu katak feto mós iha kbiit. Feto mós bele kaer kilat no halo funu.

Iha situasaun ohin loron ne’ebe akontese violensia ho tipu oin-oin, Prezidente Republika hateten iha abuzu no violénsia tipu oin-oin ba feto iha ita-nia sosiedade ohinloron, inklui ba labarik- feto sira. La iha respeitu ba feto iha uma laran rasik, iha abuzu poder no asédiu seksual ba funsionáriu feto sira iha servisu-fatin. Iha mós abuzu ba feto iha transporte públiku. Feto sai vulnerável bainhira la’o mesak. Situasaun sira ne’e preokupa Prezidente Repúblika no tenke preokupa sidadaun hotu-hotu.

Relasiona ho kazu krime ne’ebe akontese iha sexta-feira liubá, iha Rai Kotuk, Prezidente Lu Olo hateten krime ne’ebe hasoru inan feton no inan Domingas Soares, nudar preokupasaun ita hotu nian.

Prezidente husu ba Polisia Nasional Timor-Leste (PNTL), presiza lalais prosesu investigasaun atu autor krime ne’ e hetan kastigu tuir lei haruka. Krime hanesan ne’e labele akontese tan iha ita-nia rain Timor-Leste livre no independente.

“Hau fiar katak autoridade relevante sira sei hola medida efetivu liután, hodi proteje feto no ema vulnerável sira iha ita-nia sosiedade. Ha’u apela ba komunidade rasik atu hametin vijilánsia hodi proteje malu no nune taka dalan ba krime ne’ ebé de’it iha ida-idak nia área hela-fatin. Husi sorin seluk, ita presiza tebtebes uza teknolojia foun atu aprende buat di’ak, la’ós halo asédiu seksual, liuhusi ezibisaun pornográfika ba ita-nia inan no feton sira”, hateten Prezidente Republika, 03/11.

Loron 3 Novembru tenke sai loron espesiál ida atu halo refleksaun klean  ba ita ida-idak nia hahalok no hanoin kona-ba feto sira. Balun ita-nia feton, balun ita-nia inan doben. Ita presiza sira iha ita-nia moris loron-loron, iha fatin hotu-hotu no ba ita-nia mehi hotu-hotu.

“Hamutuk ita valoriza ita-nia inan no feton sira, Ita valoriza sira nu’udar ita-nia an rasik, valoriza ita-nia família, ita-nia sosiedade no ita-nia Povu. Hamutuk ita tanen as no domin feto Timor-Leste”, hateten Prezidente Lu Olo

Print Friendly, PDF & Email

LEAVE A REPLY

Please enter your comment!
Please enter your name here