Home Notisia Loron Feto, PR: Ita Sedauk Valoriza Feton Sira Iha Tempu Ukun-an Nudar...

Loron Feto, PR: Ita Sedauk Valoriza Feton Sira Iha Tempu Ukun-an Nudar Ema

280
0
Prezidente da Republika, Dr. Francisco Guterres Lu Olo. [Foto: Copyright Media PR | 27.03.2020]

Reportazen Zevonia Vieira

“Maibé ita seidauk hatene uza potensiál feto sira-nian iha prosesu foti desizaun ba fó benefísius barak liu ba família no ba ita-nia sosiedade. Biar ita valoriza tebes feto sira-nia partisipasaun iha luta maibé ita seidauk  valoriza ita-nia inan no feton sira, iha tempu ukun-an, nudar ema, sidadãun no traballadora”. Prezidente Republika.

Loron 3 Novembru nudar loron nasional Feto Timor-Leste nudar loron ne’ebe feto rural ida, nudar kombatente libertasaun nasionál, barani reziste ho kilat iha liman to’o mate. Ninia barani, foufoun kedas, iha ita-nia luta libertasaun nasionál, loke neon ba kombatente hotu-hotu katak feto mós iha kbiit. Feto mós bele kaer kilat no halo funu.

Lia fuan hirak ne’e hato’o hosi Prezidente Republika, Dr. Francisco Guterres Lu Olo, relasiona ho loron Feto Nasional Timor-Leste, ne’ebe monu iha loron 3 Novembru.

Liu hosi diskursu ofisial, Prezidente Republika hateten Uruk-Bele, ne’ebé ikusmai koñesidu liu ho naran Maria Tapó, barani hatán ba atake militar ida ho nia kilat, maibé hetan tiru no mate iha Tapó, Bobonaro, iha 3 Novembru 1975.

Iha tinan tuir kedas, loron 3 Novembru konsagra no selebra  nudar loron Nasionál Feto Timor-Leste, iha área libertada sira ne’ebé kontrola husi FRETILIN. Hafoin ita restaura Ukun Rasik-an, liuhusi Lei númeru 10/2005, 10 Agostu, Estadu Timor-Leste konfirma 3 Novembru, nu’udar Loron Nasionál Feto Timor-Leste, nu’udar mós data komemorativa ida, iha ita-nia rai doben.

Prezidente Lu Olo hateten inan no feton sira partisipa iha luta libertasaun nasionál no balun nia kontribuisaun hakerek ona, balun  nian seidauk. Tanba feto sira partisipa iha aspetu hotu-hotu atu ita hetan ukun rasik-an, ita bele dehan katak ita prátika tiha ona polítika inkluzaun sosiál.

Tanba hakarak hakoak nafatin polítika inkluzaun sosiál mak Konstiuisaun RDTL, liuhusi artigu 17°, defende igualdade entre mane no feto.  Katak mane ka feto iha direitu no obrigasaun hanesan iha vida família nian no iha área kultural, sosiál, ekonómika no polítika. Tanba ne’e, husi kedas Primeiru Governu Konstitusionál to’o agora, iha sempre estrutura ida hatuur iha Governu laran hodi promove igualdade jéneru.

“Feto tenke iha mós oportunidade hanesan ho mane sira. Oportunidade atu hasa’e kbiit, liuhusi edukasaun to’o nível as liu, atu hakbiit-an ho kapasitasaun tékniku-sientífika iha área ne’ebé de’it, atu hetan empregu, atu partisipa ho kbiit atu halo mós desizaun ne’ebé de’it, iha vida nasaun nian”, hateten Prezidente Republika

Prezidente Repubkika fo hanoin katak tinan-tinan ita selebra loron nasionál feto, maibé ita seidauk fó importánsia loloos ba feto ninia papel, nudar ema no inan, ne’ebé hala’o knaar iha família, prepara aihan nutritivu, tau matan ba oan sira-nia saúde di’ak no haruka ba eskola, eduka sira kona-ba valores no prinsípius. Knaar sira ne’ e feto halo horiuluk no sei halo ohin loron no aban bairua.

“Maibé ita seidauk hatene uza potensiál feto sira-nian iha prosesu foti desizaun ba fó benefísius barak liu ba família no ba ita-nia sosiedade. Biar ita valoriza tebes feto sira-nia partisipasaun iha luta maibé ita seidauk  valoriza ita-nia inan no feton sira, iha tempu ukun-an, nu’ udar ema, sidadã no traballadora”, hateten Prezidente Republika, 03/10

Rezultadu  resenseamentu ikus liu halo iha tinan 2015, husi populasaun besik millaun 1.3, populasaun feto liu rihun 600 kuazi hanesan ho populasaun mane.

Relasiona ho numeru ne’e Xefe Estadu dehan númeru ne’e hatudu populasaun feto boot tebes iha Timor-Leste. Ne’e forsa ida ne’ebé Estadu Timor-Leste tenke konsidera, “ita tenke hala’o duni polítika inkluzaun sosiál efetivu ida atu garante feto sira-nia kbiit atu hanoin, halo no deside. Tempu to’ o ona atu rekoñese feto sira nu’ udar riin importante ida ba ita-nia Nasaun”.

Nia hateten Sekretaria Estadu ba Igualdade no Inkluzaun (SEII)  bele halo programa di’ak tebes, maibé labele hetan susesu enkuantu sosiedade la muda hanoin no atitude kona-ba feto.

Prezidente Repúblika hatene katak iha abuzu no violénsia tipu oin-oin ba feto iha ita-nia sosiedade ohinloron, inklui ba labarik- feto sira. La iha respeitu ba feto iha uma laran rasik, iha abuzu poder no asédiu seksual ba funsionáriu feto sira iha servisu-fatin. Iha mós abuzu ba feto iha transporte públiku. Feto sai vulnerável bainhira la’o mesak. Situasaun sira ne’e preokupa Prezidente Repúblika no tenke preokupa sidadaun hotu-hotu.

Print Friendly, PDF & Email

LEAVE A REPLY

Please enter your comment!
Please enter your name here