Home Justisa SEII: Violénsia Hasoru Feto no Labarik-Feto Nudar Kazu Violasaun Direitu Umanu

SEII: Violénsia Hasoru Feto no Labarik-Feto Nudar Kazu Violasaun Direitu Umanu

1133
0
Secretaria Estadu Igualdade no Inklusaun [SEII] Maria José da Fonseca Monteiro. [Foto: Francisco JDA | 06.03.2020]

Reportazen Zevonia Vieira

“Nu’udar Sekretária Estadu ha’u lamenta tebetebes aktus ida-ne’ebé halakon ona inan no feto maluk ida nia vida moris no hakanek nia oan feto iha nia uma-laran rasik”, Sekretaria Estadu Maria Jose da Fonseca,

Sekretari Estadu Igualdade no Inkluzaun (SEII), Maria José da Fonseca Monteiro de Jesus kondena maka’as aktus krime omísidiu hasoru inan feton Domingas Soares no hakanek nia oan feto LM husi suspeitu LH, ne’ebé akontese iha Aldeia Terra Santa, Raikotu, Dili iha loron Sesta-Feira, Iha 30 Outobru.

Liu hosi komunikadu imprensa ne’ebe Neon Metin asesu Sekretaria Estadu ba Igualdade no Inkluzaun ho estrutura hotu iha SEII, hato’o sentidu kondolénsia kle’an ba alin LM no família tomak ne’ebé mak lakon ona sira-nia inan, bin, alin, no oan-feto matebian Domingas Soares iha trajédia Raikotu. 
 
“Nu’udar Sekretária Estadu ha’u lamenta tebetebes aktus ida-ne’ebé halakon ona inan no feto maluk ida nia vida moris no hakanek nia oan feto iha nia uma-laran rasik”, hateten Sekretaria Estadu Maria Jose da Fonseca, 01/11.
 

Nia dehan ita hotu hatene katak violénsia hasoru feto no labarik-feto hanesan kazu violasaun direitu umanu, ne’ebé penetrante liu iha Timor-Leste no hanesan mós kazu krime ida-ne’ebé mak ladún hetan julgamentu. Tanba ne’e duni mak sei sai hanesan kazu ida-ne’ebé bele fó ameasa seguransa no dame iha uma-laran, sosiedade no iha dezenvolvimentu estadu ida nian.

“Ita labele nonok no tolera tan krime iha forma saida de’it hasoru feto no labarik-feto sira. Ita hotu-hotu hatene katak krime hasoru feto no labarik-feto hanesan krime estruturál ne’ebé rekere ita hotu-hotu nia asaun tantu feto ka mane, ferik ka katuas joven feto no joven mane, labarik-feto no labarik-mane sira hamutuk halo esforsu koletiva hodi responde no hapara aktus violénsia sira ne’e iha ita-nia sosiedade. Impaktu husi violénsia kontra feto no labarik-feto bele metin iha sira-nia moris tomak ne’ebé iha kustu maka’as ba vítima, família, sosiedade relasiona ho saúde, ekonomia no sosiál ba ema nia moris di’ak”, Sekretaria Estadu

SEII apela ba autoridade no entidade ne’ebé kompetente hodi foti medidas lalais ba invetigasaun no prosesa kazu krime hasoru matebian Domingas Soares no nia oan-feto LM. Husu mós ba entidade relevante sira atu koordena hodi fó asistensia fizikolójika no asisténsia sira esensiál seluk ba alin no oan-feto maluk LM nune’e nia bele rekopera lalais husi trauma ne’ebé kauza husi akontesimentu trájiku ida-ne’e.

SEII nu’udar institusaun governu nian sei halo mós koordenasaun ho interministeriál sira hodi halo monitorizasaun ba progresu kazu ida-ne’e no asegura vítima hetan apoia sira ne’ebé mak nesesária hodi nia kontinua nia moris. 
 
“Mai ita hotu-hotu hamutuk hodi dehan lae no hapara Violénsia saida de’it hasoru Feto no Labarik-Feto sira”, SEII deklara

Print Friendly, PDF & Email

LEAVE A REPLY

Please enter your comment!
Please enter your name here