Reportajen Umbelina dos Reis
Komemora Loron Nasional Juventude ba dala-20 no mos komemora loron masakre santa cruz 12 de novembru 1991 ba dala-34 ho tema “Hau ema Timor Orgullu ho hau nia nasaun”, Husu ba Juventude foinsae sira tenki estuda no aprende onestidade nune’e ita hamutuk lori Timor ba oin, mezmu dau-daun ne’e iha partidu no organizasaun arte marsiais oin-oin, maibe buat sira ne’e rikusoin nasaun nia hodi haforsa ita nia nasaun laos haketak. Nune’e ita hamri’ik metin iha juventude loriku as’wain sira nia ain fatin, banati tuir ba labarik joven no foinsae sira.
Vise Primeiru-Ministru, Ministru Koordenador ba Asuntu Sosiais, Mariano “Asanami” Sabino hateten, ohin ita komemora loron juventude nasional no komemora 12 de Nvembru, primeiru ita hamutuk hakruuk nafatin hodi fo onra no gloria ba juventude loriku as’wain sira ne’ebe hamutuk ho ita hodi dedika sira nia an ba iha 12 de Novembru.
” Foinsae sira hanoin katak sei iha komprimisiu boot ba eskola tanba ita nia luta ne’ebe mak todan sofre no mate barak liu maibe ita kompara ho rai balun ne’ebe mak la luta makaas hanesan ita, tanba hahu hosi dadersan ita hahu hananu hinu nasional, sira halo komprimisiu de onra ba ita nia rai, maibe ita ikus-ikus ne’e laiha. Nune’e nu’udar Ministru Koordenador asunto sosiais orienta no ordena ona nia orientasaun ho ensinu superior hodi fo hanoin ba joven ida-idak nune’e dadersan kontinua hananu nafatin hinu nasional ba ita nia nasaun no eroi sira.” Dehan Vise Primeiru-Ministru, Mariano Asanami Sabino, liuhosi nia diskursu ba komemorasaun loron 12 de novembru ba dala-34, iha semiteriu santa cruz, Qintal-boot, kuarta-feira, 12/11.
Nia dehan husu ba manorin nain sira iha fatin hotu-hotu laos deit lei no regulamentu, maibe tuir ita nia konxiénsia fuan no atitude komprimisiu hodi orienta ba ita nia oan sira hodi rekoñese nafatin katak liberdade pas no estabilidade ne’ebe ita hetan la mai ho gratuita maibe ita sosa ho 300 mil pesoas ne’ebe mate ba rai ida ne’e, tanba ne’e mak konstrusaun ba paz tenki sai isin lo-lon ba ida-idak halo konstrusaun ba estadu no nasaun nune’e sai konstrusaun ba karakter badinas no esforsu tanba ne’e as’wain sira nia ran.
Nune’e husu ba foinsae sira hotu iha rai liur hanesan Korea, Australia, Portugal, Inglatera no Irlandia halo servisu kiik-oan ka boot imi halao mandatu istoria eroi sira nia, tanba imi servisu hatama orsamentu mai Timor-Leste hodi haburas ekonomia iha ita nia rai laran, tanba ne’e mak ita orguillu tanba imi mak as’wain nafatin. “Tanba bainhira hau vizita nasaun Korea husu ba kompaiña sira respeita nafatin traballador Timor oan servisu dignu nu’udar ema tanba luta ba Direitus Umanus no dignidade ne’e ami fakar ran mak hodi hetan nune’e tane aas nafatin Traballador Timor oan servisu iha fatin ne’ebe deit.”
Nia informa, ba labarik no foinsae sira tenki estuda no aprende unidade no onestidade nune’e ita hamutuk lao ba oin, mezmu agora partidu oin-oin, organizasaun arte marsiais oin-oin maibe nee rikusoin nasaun nia hodi haforsa ita nia nasaun laos haketak ita.
Nune’e ita hamri’ik metin iha sira nia ain fatin hodi fo banati tuir ba foinsae sira atu hakat tuir nafatin sira nia ain fatin, maske ita sei iha dezafius no problema oin-oin maibe loriku as’wain nafatin sai lilin ne’ebe lakan ba sosiedade sira ne’ebe sei iha triste nia laran ita nafatin sai lilin lakan hodi fo naroman no esperansa ba rai Timor nia ema, natureza no rekursu umanus hodi lori rai Timor ba oin.
” Hakruk no fo omenajen ba juventude loriku as’wain sira hodi nafatin fo ran turuk no naroman ba ita nune’e ita nafatin moris ho simplesidade, ita kiak maibe ita festa ne’e gasta arbiru tanba lia-mate, lia-moris ita laiha respeitu ba han-han sira ne’ebe oituan deit iha bikan laran maibe ita laiha respeitu, maibe uluk ne’e han-han laiha susar iha funu laran, maibe ohin loron ita laiha respeitu. Nune’e agora ita tenki respeitu ba han-han sira ne’e tanba han-han ne’e mai hosi lutador sira nia sakrifisiu. Agricultor sira ne’ebe esforsu iha kraik luta hodi soberania ba ai-han tanba soberania ai-han mak soberania polítika no estadu tanba ne’e imi nafatin sai as’wain FALINTIL luta iha kraik hodi produz ai-han, ita labele dependente ai-han hosi rai seluk, nune’e kada Ministériu tenki esforsu hodi hatur ita nia soberania ba rai ida ne’e.” Nia Konklui.
