Reportazen Francisco JDA
Asosiasaun Difisensia Timor Leste (ADTL) relata informasaun konaba situasaun ne’ebe maluk ho difisiensia hasoru, durante Covid-19 daet iha Timor-Leste.
Diretor ADTL,Cesario da Silva iha konferensia imprensa iha Centru Informasaun Impaktu Covid-19 (CIIC), hodi relata katak ema ho difisiensia konsidera vulneravel liu, kompara ho grupu sira sleuk, tanba familia hosi ema ho difisiensia la tau sira iha prioridade iha uma laran.
“Ema ho Difisensia la asesibel ba asesu komunikasaun, asesibilidade fiziku, hodi garante partisipasaun involvimemtu, tanba barak mak esklui hosi familia, maske ADTL rasik fornese ona nesesidade bázika no ijiene maibé seidauk responde hotu ka intervensaun hotu hosi númeru ema ho difisensia hamutuk 38.118 iha territóriu laran, maibé halo ona intervensaun, hodi ajuda nesesidade bázika ho 25% ba membru sira. Asosiasaun”, hateten Diretor ADTL iha FONGTIL
Diretor ADTL hatuan ema ho difisiensia moris iha risku boot hasoru Covid-19, tanba iha bareira sira iha prevensaun inklui imunidade ne’ebe fraku. Estudante ho difisiensia sira, la partisipa iha programa eskola iha uma, tanba laiha kondisaun no mos la asesibel liu ba maluk ho difisiensia tilun no matan
ADTL husu governu liu-liu Ministeriu relevante, atu asegura ema ho difisensia hetan informasaun adekuadu, inklui fornese nesesidade baziku no hijene. Programa eskola ba uma tenke asegura asesibilidade, atu estudante ho difisensia bele tuir.
ADTL husu tenke ratifika Konvensaun Internasional Nasoens Unidas (ONU) ba direitu ema ho difisensia, atu bele sai guia ba governu halo asaun ba ema ho difisensia, husu mós ba entidades hotu ne’ebé halo atividade asaun Sslidariedade, favor maluk difisensia sira tau mós ba imi nia targetu no prioritariu.
