Home Justisa TLPU Husu Kria Lei Krimi Cibernetiku, Francisco: Lei Tenke Refere Ba Espiritu...

TLPU Husu Kria Lei Krimi Cibernetiku, Francisco: Lei Tenke Refere Ba Espiritu KRDTL

325
0
TLPU halo konferensia imprensa. [Foto: Santina Lucia da Costa | 13.06.2020]

Reportazen Santina Lucia da Costa

Relasiona ho projetu Lei Defamasaun ne’ebe Ministeriu Justia iha ona inisiativa atu kriminaliza Lei refere, liu hosi konferensia imprensa Timor-Leste Press Union hateten katak esbosu Lei ne’ebe mak Ministeriu Justia prepara ho intensaun kriminaliza defamasaun, ne’ebe mak antes ne’e hasai tiha, maibe depois governu hanoin atu promove atu kriminaliza fila fali.

Prezidente TLPU, Manuel Pinto hateten TLPU nia pozisun ba proposta Lei ne’e, atu hahu pratika hamate prinsipiu hosi nasaun estadu direitu demokratiku, tanba prinsipiu fundamental hosi estadu direitu demokratiku mak Liberdade.

“Se ita koalia konaba defamasaun maka ita kriminaliza, entaun aktus ida ne’e indireita hamate ona ema  nia liberdade atu hato’o nia espresaun”, hateten Manuel Pinto.

Manuel Pinto hatutan inisiativa atu kriminaliza Lei Defamasaun ne’e,  nudar aktus traisaun ba Konstituisaun Republika Timor-Leste rasik, Konstituisaun iha artigu 40 ho 41 deskreve klaru konaba liberdade espresaun no liberdade imprensa ninian.

TLPU haree katak bainhira proposta Lei ida ne’e mak hetan duni fatin, atu bele sai hanesan Lei ida ne’ebe aplika iha Timor, “Ita hahu pratika Lei kolonial ninian, tanba defamasaun ninia orijin ne’e, nasaun kolonial sira mak uza. Sira uza artigu ida ne’e hodi sai hanesan sira nia defeza ba sira nia ukun rasik. Tanba kuandu defamasaun iha ne’e, indireita ita laiha ona buat ida, bolu dehan kontrolu sosial ne’ebe pasiva ona”.

Liu hosi konferensia imprensa Manuel Pinto hateten problema kriminaliza defamasaun iha tempu agora, nia kauza lolos mak saida? Sekarik kauza tanba ID falsu ka insulta sira iha social media, ida ne’e laos razaun fundamentu hodi kriminaliza defamasaun

“Laos defamasaun mak ita uza hodi rezolve, se politiku hanesan ne’e, entaun partidu ne’e eziste hanesan organizasaun, hau hanoin tenki harii Lei Partidu Politiku ka harii konaba Lei Cyber ninian, ida ne’e mak solusaun”, Dehan Manuel ba jornalista sira iha salaun Konsellu Imprensa, Quintal-Boot 12/6.

Iha fatin hanesan Diretor Advokasia TLPU, Francisco Simões Belo husu ba ukun-na’in sira, liuliu parte governu ne’ebe produz esbosu Lei ne’e, atu tau konsiderasaun mos ba rangking liberdade imprensa no espresaun, ne’ebe tinan ba tinan Timor hetan rangking di’ak iha nivel mundial no primeiru lugar iha Sudeste Aziatiku.

“Halo Lei tenki rekere ba espiritu Konstituisaun Republika Demokratika Timor-Leste (KRDTL), iha artigo 1 hateten katak fo liberdade ba ema, fo direitu mos ba ema, entaun espiritu ida ne’e mak tenki sai hanesan esperansa, matadalan, atu ita nia ukun-na’in sira produz Lei labele viola espiritu konstituisaun”, deklara Francisco Simões Belo.

LEAVE A REPLY

Please enter your comment!
Please enter your name here