Reportajen Adalgisa Pereira
Forum organizasaun naun governamental Timor-Leste (FONGTIL) organiza forum diálogu ho topiku polítika governu atu proteje populasaun Timor-Leste, husi moras dengue ne’ebe partisipa husi Ministeriu Saude no Organizasaun Mundial Saude (OMS), ONG ho rede setoriál sira.
Hafoin dialogu Reprezentante Diretor Ezekutivu Interinu FONGTIL, Lorenso Tito X. Lopes hateten objetivu husi dialogu atu oinsa prevene moras dengue tamba 1.4% husi populasaun mak mate tanba dengue.
“Ita halo dialogu ida nee tanba ita preoku durante iha fulan hirak liu ba moras dengue sae makas, tan ne’e halo forum dialogu atu bolu ONG no rede sektorál halo dialogu hamutuk ho Ministeriu Saude ho OMS, hodi ita hotu bele kontribui hanesan halo kampaña no sosializa ba iha prevensaun, liuliu ba komunidade sira tanba ita hatene katak Ministeriu Saude mesak labele”, dehan reprezentante Diretor Ezekutivu Interinu, Lorenso iha salaun FONGTIL Kaikoli 17/02
Atividade ne’ebé mak halo hodi prevene moras dengue hanesan halo kampaña ba komunidade, halo sensibilizasaun no fahe dubuk abate tau iha bee no rega susuk.
Sosiedade sivíl nafatin ezije ba Ministériu Saude atu esforsu makaas liu tan ba atividade ne’e, hodi hamenus moras dengue, maibe tuir perspetiva sosiedade sivil nian katak prevensaun ba moras dengue tarde liu tanba dalaruma sira foku liu ba iha covid, tan nee numeru dengue sae makaas durante fulan 3 nia laran.
