Reportajen Silvino Freitas
Festival Fronteira ne’ebe organiza husi Centro Nasionál Chega (CNC) ho Sekretáriu Estadu Arte no Kultúra (SEAK) ne’ebé realiza iha suku Costa postu Pante Makasar Oecusse la halo koordenasaun no konsiderasaun ba lia-nain suku Costa, nune’e lia-nain duvidas ho serimónia kultural ne’ebé sei realiza iha eventu refere tanba lia-nain entre Oecusse, Kefa, Soe ho Nikniki oinsá atu entende malu kona-ba sira nia lisan rasik.
Tuir lia-nain suku Costa Francisco Hais, festival fronteira iha suku Costa laiha konesimentu maskí sira fo hatene Xefe Suku Costa nian, maibé hanesan lia-nain la hatene kona-ba festival refere, maibé nia hatene katak kultura Oecusse ho Kefa ho tradisaun no lian ida de’it, kultura entre Soe Kefa ho Oecusse tuir regras ida de’it, nune’e lia-nain sira husi rai hirak ne’e mak bele tur hamutuk atu halo atividade kultural ruma no governu akompaña de’it.
“Husi ne’ebá ho ida ne’e ita Avon ida de’it Oecusse ho Kefa lian ida de’it mak Baikenu kultúra ho lisan ne’ebé hanesan, uma lisan ho naran apelidu mós hanesan, politikamente mak fahe ita ba estadu rua ho bandeira rua maibé kultúra ho tradisaun ida de’it” dehan lia-nain Francisco iha nia hela fatin Masin-Costa, (12/10).
Nia dehan tan, festival kultural ba lina fronteira ne’e husi parte governu Kupang ho Timor Leste tur hamutuk ona maibé hanesan lia-nain nunka hatene no tuur hamutuk ho lian nain sira husi Nusa Tengara Timur (NTT) kona-ba festival fronteira refere, nune’e hanesan lia-nain suku Costa la hatene informasaun kona-ba festival fronteira nian.
“Tuir hau nia hanoin ami lia-nain Oecusse ho lia-nain husi Kefa ami bele tuur hamutuk ko’alia ba jerasaun foinsae sira atu sira bele hatene istória, nuusa mak ita lian Baikenu husi Kefa Seo ba to’o Nikniki nuusa mak lian ida de’it husi lala’ok ba jerasaun foinsae atu sira bele hatene” dehan lia-nain Francisco.
Hatan ba la konsidera lia-nain sira ne’e, Prezidente Steering Committee Festival Fronteira, Hugo Fernandez dehan, informasaun ne’e la dun loos tanba hahú orsida kalan iha ona atividade kultural atu hamoos dalan ba ita nia bainaka sira, ne’ebé sei halo husi lia-nain sira husi Oekusse mak sei halo serimónia kultural hamoos dalan ba bainaka sira.
“Ha’u la dun hatene lia-nain suku Costa dehan la hatene maibé ne’e oráriu fiksu orsida kalan hahú serimónia kultural hamoos dalan tuir lisan Oekusse nian, atu aban simu bainaka sira, nune’e serimónia festival ne’e parseiru ho autoridade RAEOA, Centro Nasionál Chega (CNC) ho Sekretáriu Estadu Arte Kultura (SEAK)” konklui Prezidente steering committee Hugo Fernandez.
