Home Justisa Rede Feto: Estadu Mak Autór Prinsipál Promove, Proteje no Hakonu Direitu Sidadaun

Rede Feto: Estadu Mak Autór Prinsipál Promove, Proteje no Hakonu Direitu Sidadaun

830
0
Rede Feto nia membru sira iha konferensia imprensa. [Foto: Media Rede Feto | 04.11.2020]

Reportazen Zevonia Vieira

“Rede Feto ho ninia membru sira hanesan organizasaun sosiedade sivíl iha nia papél atu apoia serbisu Estadu tuir kbi’it sosiedade sivíl hodi defende direitu ema hotu nia liuliu feto no labarik no grupu vulnerável sira”, Rede Feto

Loron 3 Novembru nudar loron nasional Feto nian, liu hosi konferensia imprensa, Rede Feto Timor-Leste no parseiru sira hato’o parabéns ba feto maluk hotu ne’ebe selebra loron importante refere.

Liu hosi konfernesia imprensa Rede Feto hateten iha komemorasaun ne’e hodi hano’in hikas heroina sira no feto Timor tomak nia kontribuisaun no luta ba ukun rasik-an, ne’ebé to’o ohin loron kontinua firme, hodi kontribui ba dezenvolvimentu rai doben Timor-Leste.

Tuir Rede Feto nia hanoin katak iha tempu ukun-an ne’e, Feto Timor-Leste kontinua hasoru dezafiu oi-oin iha setór ekonómia, saúde, justisa, infrastrutura, violénsia no asuntu sosiais seluk, ne’ebé feto sira infrenta iha sira nia moris lor-loron.

Rede Feto ho nia membru sira, liu hosi loron nasional feto nian, fo hanoin ba publiku katak Estadu mak autór prinsipál no iha obrigasaun atu promove, proteje no hakonu direitu sidadaun nian liga ba Konstituisaun RDTL artigu 105, kona-ba kompeténsia no kna’ar Governu nian no mos  hanesan sidadaun  ema hotu, iha dever atu hamri’ik no kontra formas violencia saida deit hasoru feto no labarik.

“Rede Feto ho ninia membru sira hanesan organizasaun sosiedade sivíl iha nia papél atu apoia serbisu Estadu tuir kbi’it sosiedade sivíl hodi defende direitu ema hotu nia liuliu feto no labarik no grupu vulnerável sira”, deklara Rede Feto iha konferensia imprensa, 04/11.

Nudar organizasaun sosiasiadade sivil ne’ebe luta ba feto nia direitu, Rede Feto fo agradese ba organizasaun membru sira hanesan Pradet, Fundasaun Alola no mos parseiru sira hanesan Arquires no ALFela  no CNJTL ne’ebé fó apoiu no asisténsia direita  ba vítima depoisde akontesimentu. 

Liu hosi konferensia imprensa Rede Feto hamutuk ho parseiru sira ejize ba governu Timor-Leste no parte kompetente sira katak PNTL tenke fó siguransa máximu ba iha fatin akontesimentu, atu proteje no salva guarda ba evidénsia iha terenu. Minsitériu Públiku tenke análiza kle’an kazu, hodi akuza tuir gravidade husi kazu ne’e inklui husu indemnizasaun sivíl no garante vítima atu hetan nia direitu iha prosesu tomak. Tribunál tenki garante julgamentu nebe’e justu,  tuir lei no hatur justisa ba vítima.

Rede Feto mos ejize ba Ministériu da Justisa, tenke implementa Lei nú.2/2009 kona-ba protesaun ba testemuña/Sasin  hodi fó protesaun maxima ba alin ho inisiál LD hanesan sasin importante ba iha kazu omisídiu Raikotu no mós ba kazu sira seluk. Ba Sekretáriu Estadu Igualdade no Inkluzaun ne’ebé lidera implementasaun Planu Asaun Nasionál Violénsia ba Jéneru (GBV), tenke lidera serbisu advokásia Rede Referal nian, hodi asegura oferese suporta ba vítima tuir padraun no Ministériu Solidariedade Sosial no Inkluzaun (MSSI), ne’ebé lidera serbisu rede referel ba apoiu vítima Violénsia hasoru feto no labarik,  hodi kordena no apoiu asisténsia sosiál ba vítima.

“Ami hotu sei kontinua hala’o ami ida-idak nia papél, hodi akompaña kazu ne’e garante direitu vitima iha prosesu tomak. Aleinde ne’e, hakarak bolu atensaun no husu ba públiku hodi la bele julga organizasaun sosiedade sivíl, maibé mai ita hamutuk hodi hapara formás violénsia oi-oin hasoru feto, labarik feto no grupo vurneravél  iha Timor-Leste”, deklara Rede Feto iha konferensia imprensa

Rede Feto hanesan sosiedade sivíl  ho nia membru sira hamutuk 43, serbisu hodi promove direitu feto nian no igualdade jéneru iha Timor-Leste. Membru sira ne’ebé serbisu ligadu ho fó asisténsia ba vítima hanesan FOKUPERS, PRADET, Fundasaun ALOLA, MOFFE no parseiru sira seluk, sei hala’o sira nia papél mak akompaña kazu ida ne’e, hodi garante katak kazu ne’e la’o tuir justisa ne’ebé loloos, garante atu laiha informasaun falsas hodi labele hamenus pena ba suspeitu, fó apoiu no enkoraja sasin no mós lezada atu nafatin iha saúde ne’ebé di’ak, seguru hodi preparadu hasoru prosesu justisa.

Print Friendly, PDF & Email

LEAVE A REPLY

Please enter your comment!
Please enter your name here