Reportajen Joselina dos Santos
Sekretariu Jéral Partidu Congresso Nacional de Reconstrução de Timorense (CNRT), Francisco Kalbuady Lay hala’o enkontru ho delegasaun ASEAN iha sede CNRT Bairro dos Grilhos, kona-ba lala’ok kampaña partidu politiku sira-nian no mós Eleisun Parlamentar ne’ebe sei realiza iha loron 21 Maiu 2023.
Iha enkontru ne’e, Sekretariu Jéral Partidu CNRT, Francisco Kalbuadi Lay hateten, partidu CNRT ohin simu organizasaun ba ASEAN ne’ebé mai asiste, no sai hanesan observadór ba eleisaun parlamentar, durante semana ida iha ne’e, sira na’in-lima reprezenta ASEAN nian ohin hasoru malu, depois sira asiste kampaña CNRT horseik.
“Apresia ba reprezentante ASEAN mai Timor atu sai hanesan observadór ba ita nia lala’ok eleisaun nian, sira sente kontente espera katak iha loron 21 fulan maiu bele iha eleisaun ida ne’ebé mak justu nomós honestu”, dehan Sekretariu Jéral Francisco Kalbuadi Lay iha Sede CNRT Bairro dos Grilhos, sexta 19/05.
Nia haktuir, ASEAN apresia no sira husu kona-ba obstakulu ne’ebé CNRT hasoru durante iha kampaña maibé laiha tanba iha mundu iha fatin hotu-hotu sempre iha asidente kiik no rona isu oin-oin maibé só até agora iha asinde kiik sira mak akontese mais apela ona ba Timor-oan tomak katak festa demokrasia ne’e ba ema hotu tanba na’in mak povu no povu mak deside.
“Ita hein deit povu mak deside iha bain-rua partidu ida ne’ebe povu deside tanba desizaun iha povu nia liman. Nune’e husu ba militante no simpatijantes sira nafatin hakmatek iha idak-idak nia fatin liu-liu Fiskais sira atu partisipa diak iha Sentru votasaun nian, mai ita hotu haraik-aan atu fó tulun ba Timor-oan tomak”, nia informa.
