Reportajen David da Costa Gusmao
Sekretáriu Estadu Protesaun Sivíl (SEPS) ho Autoridade Munisípiu, Postu Administrativu, Xefe Suku ho Xefe Aldeia no parseria sira, hodi rekolla ona dadus ba populasaun sira ne’ebe afeta ba inundasaun ne’ebé akontese iha munisípiu 7 no família uma kain hamutuk 1361 maka afetadu ba iha dezastre.
Sekretáriu Estadu Protesaun Sivíl, (SEPS) Joaquim José Gusmão dos Reis Martins, informa , populasaun sira ne’ebe afeita husi inundasaun iha Munisípiu Covalima, Viqueque, Manufahi, Ainaro, Baucau, Manatutu no mós Lautem, no familia hamutuk uma kain 1361 maka afeitadu.
“Ita rekolla informasaun iha 7 Jullu hamutuk família 1361 kompostu husi Munisípiu 7 maka Covalima, Viqueque, Manufahi, Ainaro, Baucau, Manatutu no mós Lautem,” Dehan Sekretáriu Estadu Protesaun Sivíl, (SEPS) Joaquim, Iha Palasiu Governu Sexa 8/07.
Iha Munisipiu Covalima rejista familia 250 maka hetan dezastre inundasaun ka be sae, ema hamutuk 547 iha postu suai Vila Maukatar no Tiliomar. Iha Viqueque uma kain hamutuk 554 ne’ebe maka afeita ba dezastre no ema hamutuk 1656 iha postu Viqueque vila, iha postu Watulari no postu watu karabau, no Iha Munisipiu manufahi rejista familia uma kain 206 ne’ebe maka afeitadu no ema hamutuk 1014.
Nune’e iha fali Munisipiu Ainaro rejista familia 3 maka afeitadu. Iha Munisipiu Baucau familia 11, iha Munisipiu Manatutu postu Barique familia 327 maka afeitadu no ema hamutuk 1566 iha suka Aviaun no suku Sikone Beloi, no Iha Munsipiu Lautem familia 2 maka afeitadu.
Entretantu Anin boot sobu uma 1 iha Luutem, no uma 1 iha Baucau, uma 1 iha Viqueque no uma 1 iha Covalima. No rai halai taka uma 1 iha Bobonaru, uma 1 iha Manufahi, uma 2 iha Viqueque no uma 1 iha Lautem.
Uma ne’ebe maka hetan estragu hotu hamutuk 218. iha Covalima 3, iha Manufahi 9, Ainaro 3, Baucau 12, Lautem 1, Bobonaru 1 no Viqueque 189.
“Ida ne’e maka dadus ikus husi ita nia ekipa protesaun Sivil hamutuk ho Autoridade Munisipiu autoridade postu Administrativu, xefe suku no xefe aldeia, ita nia parseiru sira ne’ebe iha Munisipiu sira hanesan CVTL, NGO Internasional sira ne’ebe oras ne’e fo nafatin apoiu ba ita ninia komunidade sira,” hatete Joaquim.
Maibe ekipa Protesaun Sivíl kontinua fo apoiu emrjensia hahan ba iha populasaun ne’ebe maka afeita ba iha inundasaun, ida ne’e pakote ne’ebe protesaun sivil sempre tau stok iha Munisipiu hotu, iha 500 pakotes no iha Munisipiu balun ne’ebe sei menus protesaun Sivil kontinua haruka ba hodi apoiu ba populasaun sira.
“Hanesan ohin hau dehan katak iha Munisipiu Viqueque maka iha vitima barak loos, Suai no mós Alas, ita aumenta tan pakte ba ne’ebá para hodi apoiu ba ita nia maluk sira ne’ebe maka sofre,” Tenik Joaquim.
