Reportajen Umbelina dos Reis
Prezidente Forum Komunikasaun Juventude (FKJ), Cipriano Freitas hatete tinan 2022 ida ne’e, sira iha planu halo festival muzika ba labarik vítima sira iha loron internasional labarik, 20 Novembru, ho objetivu atu hahú fali mundu labarik nian.
Prezidente Cipriano dehan, festival muzika ne’e dezde sira hahu iha tinan 2004-2007, para iha tinan 2008. Nia argumenta, dala barak ita dehan orgullu ho labarik sira iha Timor-Leste, maibe realidade sai orgullu ba labarik labarik Timor-Leste ida ne’ebe? Ho ida ne’e mak sira hakarak promove fali festival muzika ba labarik nia mundu.
“Bai-bain ami halo atividade ne’e iha loron 20 Fulan Novembru, loron internasional ba labarik, ne’ebe mai ita tau liman hamutuk hodi fo fila fali labarik nia mundu, Timor agora ukun aan ona demokrasia, ita iha ona buat hotu-hotu tanba saida mak labarik iha Timor sofre nafatin,” hateten Cipriano iha nia diskursu, iha edifisiu Lafaek News, Kintal Boot, 29/07.
Iha fatin hanesan Dírcia, reprezentante vitima sira hato’o nia poezia, “ami la promete ba na’i ulun sira katak ami sai susesu, maibe ami nafatin esforsu an ho grasa Na’i Maromak nian sei susesu iha loron ida, sucesu la signifika ita tuur de’it iha fatin hodi hein mosu mai de’it, maibe susesu presija esforsu ho pasensia. ami agradese tebes ba inan doben eis prezidente republika Cidalia ne’ebe hanoin ho komprende no suporta tebes ami nia situasaun sira nee.”
Ho ida ne’e mak motiva ami mezmu ami hasoru difikuldade oi-oin maibe ho vontade tomak hodi aprende nafatin, dezafius ne’ebe iha pasadu la’os razaun hodi satan ami nia futuru, basa husi terus no susar, husi mukit no kiak mak hafoin ita hetan susesu, Dircia dehan.
Prezidente FKJ hateten sira iha fatin ne’e dezde 2002, ho atende ba problema labarik sira hodi guarda alin vitima sira hosi idade 0 to’o 20 anos ne’ebe hetan sofrementu barak.
“Wainhira ita referendu hotu labarik barak mak iha dalan, momentu ami hala’o atividade iha Ministeriu Justisa, ami haksolok labarik sira iha Fulan Dezembru 23-30 kalan, ami anima sira ho kanta fo ha-han ba sira hotu mak ami husu sira ida-idak iha momentu ne’eba”, dehan Cipriano
Nia konklui katak sira hetan labarik 200 depois husu tuir sira nia inan-aman iha hela Kupang, Atambua. Dadus ne’ebe sira hetan apoiu husi UNICEF no nafatin apoiu sira to’o sai NGO no iha tinan 2005 sira hamutuk ho govenru MSSI to’o ohin loron.
