Reportajen David da Costa Gusmao
Diretór Jerál Sekretariadu Tékniku Administrasaun Eleitorál (STAE), Acilino Branco informa halo ona kontaktu ba Brigada sira iha sentru votasaun iha Munisípiu 12, inklui Reijaun Administrativa Espesial Oe-cusse (RAEOA) maibé seidauk rejistu kazu ruma iha sentru votasaun sira.
“Ha’u nia monitorizasaun liuhusi kontaktu ba iha Diretor STAE sira iha Munisípiu 12 no Oecusse, prinsípiu to’o agora ita la rejistu situasaun balun ne’ebé bele impede atu ita nia sidadaun sira bele ezerse sira nia direitu de votu ne’e ho loloos” dehan Diretór Jeral STAE, hafoin halo observasaun ba iha sentru votasaun iha eskola EBC Faról, Tersa 19/04.
Nia esplika daudaun ne’e eleitores sira kontinua forma iha sentru votasaun sira maibé iha sentru votasaun sira ne’ebé mak ki’ik, eleitores hahú menus ba bebeik ona.
“Ida ne’e signifika katak, di’ak tebetebes, para depois ita halo preparasaun monitoring atu nune’e bele remata lalais hodi kontinua ba Kontagem de votus sira” tenik nia.
Iha Eleisaun Prezidensiál ba segundu Volta ne’e, STAE kontinua halo preparasaun másimu mezmu akontese situasaun ki’ik balun maibé konsege rezolve ho di’ak to’o agora sentru votasaun sira la’o ho di’ak.
Nune’e observasaun jornalista Neon Metin iha terrenu katak, iha sentru votasaun Eskola Ensinu Basiku Central Farol, hetan objervasaun masimu husi objervador internasinal no nasional no hetan seguransa másimu hosi Polisia Nasional Timor-Leste (PNTL).
