Reportajen Joselina dos Santos
Komisaun Nasionál Eleisaun (CNE), fo sai rezultadu apuramentu nasionál husi Munisípiu rua hanesan Aileu no Ainaro ba loron dahuluk nian ba públiku, tanba númeru reklamadu nia volume oituan, maibe votu nulu barak tebes, tanba liu husi prosesu verifikasaun ne’ebe intensivu husi profesionál sira, hamutuk Komisáriu, ne’ebe prezensa mos observadór nasionál no internasionál liu-liu fiskais sira.
Iha konferensia imprensa Prezidente CNE, Jose Agostinho Belo hateten iha loron 22 Marsu 2022, Komisaun Nasaun Eleisaun (CNE), hahú halo ona apuramentu nasionál iha tuku 14:00 lorokraik. Tuir lei dehan iha Apuramentu Nasional, CNE sei verifika konsitensia iha akta sira, deside definitivamente votu nulu, no votu reklamadu sira, no mos foti desizaun ba reklamasaun sira.
“To’o oras ne’e CNE konklui ona prosesu apuramentu ba Munisípiu Aileu no Ainaro. Husi Munisípiu Aileu, hahú halo prosesu apuramentu iha tuku 14:00, loron 22 Marsu 2022. Votu reklamadu hamutuk 4, hafoin halo verifikasaun deside 3 sai válidu, ne’ebe atribui ba kandidatura númeru 6, no ida sai nulu,” dehan Prezidente CNE, Jose Agostinho Belo ba jornalista sira iha Salaun CNE Kolmera, 23/3.
Prezidente CNE dehan votu nulu husi munisipu Aileu hamutuk 526, sira konsege verifika, no depois de verifikasaun no votu husi nulu, balu sai fali válidu ba kandidatu sira husi númeru 1 to’o 16, votu válidu husi Aileu iha 154, konsidera válidu no mantein nafatin 372 ne’ebe númeru ne’e fahe ba kandidatu 16 tuir ida-idak nia votu, ne’ebe ita konfirma katak hili no merese duni hetan votu ida ne’e.
Husi Munisípiu Ainaru hahú iha tuku 16:00. Iha votu reklamadu 1, desizaun nafatin nulu. Bulletin nulu hamutuk 779, depois halo verifikasaun deside votu hamutuk 559 mak mantein nulu, no votu hamutuk 180 mak sai válidu
Nia dehan ho deskrisaun ba handidatu 16, total votu nulu hosi Munisípiu rua ne’e hamutuk 1.305, deside sai válidu hamutuk 334, ne’ebe mantein sai nulu hamutuk 931. Prosesu tomak ne’ebe apuramentu hala’o to’o kalan boot, ita verifika duni tanba iha prinsípiu ida katak, oinsá votus nulu ne’e verifika halo di’ak, atu nafatin direitu ba kandidadu ida-idak, fiskais sira koopera ho di’ak, maibe prezensa fiskais menus tanba kandidata husi númeru 1 to’o 16 fiskais balu de’it mak marka prezensa
Nia dehan total votu reklamadu hosi munisipiu rua ne’e hamutuk 5, deside sai válidu 3 no sai nulu hamutuk 2. Prosesu verifikasaun ba votu nulu no reklamadu husi Munisipiu Baucau daudaun ne’e la’o hela.
“Liu husi verifikasaun munisípiu rua hatudu katak iha mudansa, tanba ne’e ha’u hanoin servisu tabulasaun ne’ebe CNE halo katak, ita hein to’o 72 oras rezultadu ne’ebe sei sai, oinsá aumenta sira ne’ebe iha ou mantein nafatin votu númeru ne’ebe iha, ho reklamadu sira ne’ebe depois ita verifika balu válidu no balu mantein nafatin,” dehan Jose Belo
Durante prosesu verifikasaun iha apuramentu nasionál, CNE identifika mos kestaun sira balu hanesan akta estasaun votasaun, balun Sekretaria Estadu Votasaun la asina, no akta orijinál Sentru Votasaun balun foer, iha mos akta Sentru balu prienxe la loos, maske nia rezultadu loos, maibé entre votantes mai vota mak la loos.
