Reportajen David da costa
Serimónia komemorasaun loron Proklamasaun Indepedénsia 28 Novembru tinan ida ne’e, sei komemora iha Rejiaun Administrativu Espesial Oekusi (RAEOA). Tanba ne’e, atu asegura seguransa ba iha eventu ne’e, Komandante Jerál PNTL simu ona informasaun katak Unidade Patroliamentu Fronteira (UPF), Unidade Polisia Maritima (UPM) , nomós Unidade Espesiál da Polisia (UEP) hetan ona orentasaun husi Unidade Patroliamentu Fronteira (UPF) atu asegura Fronteira metin liu tan. Atu nune’e eventu Nasionál iha RAEOA ne’e la’o diak.
Komandante Jerál PNTL, Komisáriu Jerál Henrique da Costa, hateten, Iha Polisia Nasional Timor-Leste (PNTL) nian, tantu husi komandu Munisípiu nomós Komadante Unidade sira, partikularmente UFP, UPM nomós UEP hetan ona orentasaun husi Unidade Patroliamentu Fronteira (UPF) atu asegura Fronteira metin liu tan, liuhusi kordensaun no kooperasaun ho parseiru sira ne’ebe servisu iha Fronteira.
“Ita nia parte, Unidade Espesiál da Polisia, ita orenta, para atu nune’e bele apoiu tan iha parte Oekussi ninia. Pois UPM mos ita orenta atu apoiu ba iha ne’ebá,” dehan Komandante Jerál PNTL, Komisáriu Jerál Henrique da Costa, iha Konsellu Imprensa, Kintal Boot, kinta 21/11.
Nia dehan tan la’os sira ne’e deit, maibé husi komandu Jerál PNTL rasik mós sei hatun ekipa servisu espesiál sira hanesan servisu informasaun polisa ninia ka servisu investigasaun Polisia ninia, ne’ebe maka bele para atu apoiu sira iha loron komemorasaun loron Proklamasaun Indepedénsia Timor-Leste nian ne’ebe maka sei realiza uha RAEOA.
Nia Esplika loron Proklamasaun Indepedénsia ne’ebe maka realiza iha RAEOA ne’ebe membru Polisia Nasional Timor-Leste supsente atu responde ba iha RAEOA, maibé nia númeru hira maka aloka iha RAEOA, depois haree deit iha terinu ne’ebá.
Nune’e mós Komandante Jerál PNTL husu ba ema hotu-hotu atu bele kontribui ba pas no estabilidade iha rai laran, atu nune’e bele garante ba loron Proklamasaun Indepedénsia 28 Novembru ne’ebe maka realiza iha RAEOA ne’e la’o diak, bainhira eventu la’o diak ne’e kontribui husi ema hotu-hotu nian laos husi komisaun organizadora no seguransa sira nian deit.
“Ita husu para atu nune’e sidadaun hotu-hotu, atu kontribui ba iha pas estabilidade hodi garante katak eventu Nasionál ne’ebe maka realiza iha RAEOA ne’e bele la’o ho susesu. Tanba susesu ba eventu ne’e la’os depende ba iha komisaun organizadora, no la’os depende mós ba iha parte seguransa Polisia ninia, maibé depende ba ita hotu-hotu,” nia hateten.
Tanba ne’e, karik buat ruma ladiak, ko’alia ba malu, tempu iha para ko’alia ba malu, laos uza violénsia, la’os uza media sosial para hataka malu. Tanba mesak Timor oan hotu. “ita lakoi ema seluk aproveita hodi destroi estraga ita nia rai hodi estraga ita nia futuru no ita nia jerasaun sira”.
