Reportajen Joselina dos Santos
Komisaun Reguladora Arte Marsiais (KRAM) sei servisu hamutuk ho Komandu PNTL iha nivel postu-administrativu to’o komandu PNTL munisipiu atu tau matan ba Organizasaun Arte Marsiál (OAM) sira ne’ebé treinu no fó gradua subar ba membru sira iha tempu kalan. Katak sé de’it mak la halo tuir saida mak estadu hasai ne’e servisu instituisaun seguransa nian atu haree tanba primeiru kontra dez-ovidensia ba rezolusaun nu.45/2023 no segundu sira kontra artigu 244 kódigu penal liu-liu kona-ba dez-ovidensia nian.
“KRAM nia servisu ne’e atu kontrola atividade treinamentu no organiza kompetisaun, diálogu no dezaminasaun lei ne’ebé relasiona ho arte marsiais nia ezistensia iha Timor-Leste. Organizasaun arte marsiais Federasaun iha TL hamutuk 16, governu suspende organiazasaun hirak ne’ebé amahan aan iha federasaun Silat ne’ebé membru balun sempre komete problema preturba orden publika dez-ovidensia ba orden legais sira, nune’e governu suspende hanesan organizasaun IKS-TL, PSHT no KORKA”, Dehan Prezidente KRAM Octávio da Conceição iha Edifisiu MJDAC, 16/05.
Prezidente Komisaun Reguladora Arte Marsiais (KRAM), Octávio da Conceição deklara, Organizasaun tolu ne’e nia atividade kontinua suspende to’o fulan Outumbru 2024, depoizde ida ne’e KRAM sei aprezenta relatoriu ba MJDAC atu kontinua aprezenta ba Konsellu Ministru atu hetan desizaun foun oinsá bele haree hodi reativa fali atividade arte marsiais ka la’e. Ne’e depende ba komportamentu membru, lider no treinadór arte marsial sira, tuir segunda diretiva KRAM ne’ebé uluk produz iha tinan 2022. Atu haree fali rantin no pratikante arte marsiais sira ne’ebé priénxe kriteriu mak sei rekomenda ba PM MJDAC hodi aprezenta ba Konsellu Ministru.
“Prosesu administrativa tuir lei nu. 5/2017 artigu 28 kontra orden nasional, ami kontinua fó hatene semana ohin KRAM sei kontinua enkontru ho Organizasaun arte marsial tolu hanesan IKS-TL, PSHT no KORKA atu diskute oinsá sira-nia prepasaun no kontrolu ba membru sira. KRAM mos sei servisu hamutuk ho liña Ministeriais hotu atu informa bazeia ba rezultadu re-fiskalizasaun KRAM ho Komandu Jeral PNTL nian identifika katak iha funsiunáriu publiku lubuk ida inklui mós autoridade komunitria balun mak envolve iha pratika arte marsiais atu haree hodi foti desizaun ba membru sira”, nia dehan.
