Reportagem Filomena da Conceição
Prezidente da Repúblika (PR) José Ramos-Horta, hateten, dia 03 de Maiu hanesan loron mundial ida ne’ebé komemora loron liberdade ho intensaun atu promove liberdade imprensa no liberdade expresaun hodi sai pilàr ba estadu direitu demokratiku núne’e ohin loron hanesan mós relatório ida kona-ba liberdade imprensa iha mundu no TL sai nota positivu, ne’ebè hatudu TL hetan Número 10 iha Mundu kompara ho nasaun sira seluk.
“Ohin dia Mundiál imprensa nian, ohin duni ita haree iha media sai relatóriu ida kona-ba liberdade imprensa iha mundu, i TL dala ida tan sai di’ak iha nota positivu, Hau pessoalmente seidauk lee iha relatóriu ne’e, maibé lee mak notisia iha fatin barak ne’ebè hatudu TL iha Número 10 iha mundu em termos de liberdade imprensa portanto ne’e diak tebes tanba TL sae pontu (7) tanba tina kotuk ka tinan2 liuba TL número 17 ne’e boot ona, no Portugal iha número (9) iha nasaun boot hanesan Australia EUA iha TL nia okos” dehan Horta ba jornalista sira iha Palásiu Presidensial Bairo-Pite, Kuarta 03/05.
Entretantu Presidente da República Hato’o mós parabéns ba Jornalista hotu ne’ebé haknar an iha servisu Jornalismu nian no hakruuk ba Jornalista hirak ne’ebé mate no fó sira nia vida ba rai ida ne’e tantu jornalista TL, jornalista Internasionál liu- liu ba Sander Robert, Max Stall no Balibo Five ne’ebé kontribui makaas ba rai Timor.
“Ba Jornalista hotu-hotu hakruuk ba imi no parabéns ba loron ida ne’e, ba jornalista ne’ebè mate no fó sira nia vida ba rai ida ne’e, hakruuk ba sira nia memória, tantu jornalista Timor-Leste no internasional, Laos parabéns deit maibé hakruuk no respeitu ba jornalista sira dalaruma hetan ameasa balun, maibé espera katak amesa sira ne’e la mai husi membru Governu ruma” dehan PR .
Iha diskusaun aberta ne’e, Presidente da República promete katak sei hadia Jornalista Max Sthal nia rate tanba rate ema ladun tau matan no ema balun halo bandalismo hodi halo aat fiu no letra iha jornalista Max Sthal nia rate.
Tuir relatoriu Reporters Without Border Index ba liberdade imprensa tinan 2023 ranking premeiru mak Norway, ranking 2 mak Ireland, rangking 3 mak Denmark, rangking 4 mak Sweden, ranking 5 mak Finland, ranking 6 mak Netherlands, ranking 7 mak Lithuania, ranking 8 mak Estonia, ranking 9 Portugal no ranking 10 Timor-Leste
