Reportajen Joselina Dos Santos
Governu liuhosi Sekretaria Estadu ba Igualdade no Inkluzaun (SEII), servisu hamutuk ho Igreja Katólika liuhosi Archebispo Dom Virgilio Kardeal do Carmo da Silva, halo advokasia atu konsidera ba oan ne’ebé laiha aman atu hetan sertidaun Batizmu, liuliu oan sira ne’ebe hosi insestu hanesan aman halo ba oan, oan halo ba inan, naan halo ba feto no avo halo ba beioan.
Liuhosi Konferénsia Imprensa, Sekretaria Estadu ba Igualdade no Inkluzaun (SEII), Maria do Rosário Fátima Correia hatete, SEII mós halo ona advokasia ho Archebispo Dom Virgilio Kardeal do Carmo da Silva oinsá mak Igreja bele konsidera mós oan ne’ebé laiha aman atu hetan Sertidaun Baptismu liuliu mak oan sira hosi insestu hanesan aman halo ba oan, oan halo ba inan, naan halo ba feto no avo halo ba beioan.
“Parte Igreja konkorda no autoriza ona atu fó sertidaun Batismu ba labarik hirak-ne’e. H’au mós asina ona akordu ( MoU ) ho Prezidente Autoridade RAEOA Kona ba Asuntu servisu Igualdade Jéneru no Inkluzaun Sosiál no halo lansamentu ba Livru PAN-VBJ Faze Datoluk iha RAEOA hanesan matadalan ba Implementasaun Prevensaun Violénsia Bazeia ba Jéneru iha Timor – Leste” dehan Sekretaria SEII Maria do Rosário Fátima Correia liuhosi Konfénsia Imprensa iha Salaun SEII Kaikoli, Kinta 04/05.
Nune’e liuhusi biban ida-ne’e, SEII hakarak hato’o agradesimentu wa’in ba iha GMPTL, Komisaun F Parlamentu Nasionál no Nai Prezidente da Repúblika José Ramos Horta, hodi konsidera no promulga ona iha Lei Nú. 10/2023. Hato’o mós Agradesiemntu wa’in ba iha entidades hotu tantu Nasionál no Internasionál ne’ebé la temi ida por ida , no ba Feto Timor-Leste no maluk Portadór/a defisiensia hotu iha Timo-Leste.
“Kleur tebes ona ita hein momentu ida-ne’e, no tinan ida-ne’e mehi ne’ebé ita hein hamutuk ohin konsege atinje ona liuhusi esforsu ne’ebé ita halo hamutuk. Ita hotu tenke tau forsa hamutuk hodi kontinua luta ba direitu Feto no Labarik – Feto, Maluk Portadór/a Defisiensia no Komponente Vulnerável seluk hodi halakon dezigualdade iha Timor – Leste”, nia salienta.
