Reportajen Umbelina dos Reis
Primeiru Ministru Kay Rala Xanana Gusmão hateten, relasiona ho Sekretáriu Estadu Asuntu Toponimia no Organizasaun Urbana (SEATOU), nia programa ba eviksaun ne’e tanba hakarak sidade Díli moos no furak, nune’e atu bakat ba desentralizasaun iha munisípiu hodi ema bele hakmatek iha ida-idak nia munisípiu.
“Se ita tau eviksaun ne’e ba problema boot mak hosi munisípiu tama hotu mai konsentra iha sidade Dili, mak Dili sai oinsá loos?” Dehan Primeiru-Ministru Kay Rala Xanana Gusmão, ba Jornalista sira, bainhira remata nia enkontru ho Prezidente Repúblika José Ramos Horta iha Palasiu Prezidensiál Bairo-pite, kinta-feira, 16/05.
PM dehan, ho situasaun hanesan ne’e husu ba joven sira labele buka sai funsionáriu hotu maibé haree halo aktividade produtivu ruma, tanba tinan ne’e mos loke banku dezenvolvimentu hodi fó kreditu, nune’e halo desentralizasaun iha munisípiu atu nune’e ema bele hela iha idak-idak nia munisípiu nune’e la mai ona iha sidade Díli.
“Tanba sá ema mai hotu iha sidade Díli? Tanba iha distritu buat hotu la la’o, nune’e desentralizasaun ne’e presiza governu ka ema ruma forma ho tékniku finansa, administrasaun, planeamentu no enjenária, nune’e tenta halo buat hotu iha fatin refere para ema hakmatek iha distritu.” Nia informa.
Nia konklui, joven maioria sei dezempregu hela maibé la’os akontese de’it iha nasaun Timor-Leste maibé nasaun bo-boot mos sei akontese. “Nune’e ita mak tenki hatene an katak servisu iha ne’ebé, no halo saida ne’e prepara no hadi’a dau-dauk ona.”
