Home Notisia Promove Matenek Tradisional Liu Hosi Radio Komunidade

Promove Matenek Tradisional Liu Hosi Radio Komunidade

68
0
Asosiasaun Radio Komunidade Timor-Leste (Foto: ARKTL)

Reportajen Adroaldo ‘Saretukau’ & Lucas ‘Hagho’

ARKTL  hamutuk ho Radio Komunidade Oecusse lansa Mata Dalan ba Programa Radio Komunidade kona ba promove matenek tradisional. Lansamentu ne’e halo iha Knua Juventude Fila Liman, loron 3 liuba.

Prezidente Asosiasaun Rádio Komunidade Timor-Leste (ARKTL) Prezado Ximenes esplika kona ba objetivo hosi lansamentu programa ne’e atu promove matenek tradisional mak komunidade sira iha.

“Objetivu prinsipal maka oinsá ita atu estimula ita nia kolega rádiu komunidade sira seluk karik sira iha hanoin atu prodús programa konabá matenek tradisional, sira bele aprende hosi matadalan ne’e, tanba matadalan ne’e ami halo mós, liu hosi halo  peskiza uluk, depois ami mós implementa iha rádiu komunidade Loriku Lian ho rádiu komunidade Atoni Lifau. Rádiu komunidade rua ne’e maka implementa matadalan ne’e. Depois ami haree nia rejultadu ne’e di’ak, entaun ami koko hakerek ida ne’e hodi sai hanesan referénsia ida, karik rádiu komunidade sira seluk hakarak prodús programa hanesan ne’e, pelu menus sira bele estuda hosi ida ne’e. Ni-nia objetivu maka hanesan atu fasilita de’it rádiu komunidade sira seluk atu bele prodús programa hanesan ne’e, “ Prezado hatete.

Prezado mos esplika katak, “Programa ne’e, foka liu ba oinsá iha língua materna, língua materna ne’e nia bele eziste naruk tamba língua ne’e bele fornese buat barak ba komunidade. Se língua ne’e nia kosa kata ka vokabuláriu ne’e oi-tuan, neneik-neneik nia sei lakon. Ne’ebé ita nia língua materna ne’e kuandu ita la konserva di-di’ak liu hosi programa sira hanesan ne’e,  ne-neik ema nia koiñesimentu ba língua sira ne’e mos sei menus.”

Nia mos dehan hosi matenek tradisional ita hakarak hatudu ba jerasaun foun sira katak ida ne’e maka indentidade Timor, o bele matenek to’o iha ne’ebé, mais wainhira o rona programa ne’e o bele hatene katak oh! Timor ne’e hanesan ne’e, oh ema Timor nia hanoin ne’e hanesan ne’e, ema Timor nia hatene ne’e hanesan ne’e, hodi ida ne’e bele sai referénsia ba sira.

Asesora polítika no Estratejia Komunikasaun SECOMS, Eugenia Maria de Sousa Ribeiro informa kona ba papel SECOMS nian hodi fo apoio ba inisiativa promove matenek tradisional nian.

“Polítika Sekoms nian maka sempre fó apoiu ba iha media hotu-hotu tantu média privadu, média estadu  ni-nian. Apoiu ne’e maka ida apoiu direita, ida apoiu indireita. Hanesan rádiu komunidade sira ne’e, apoiu ne’ebé mak direita hosi Sekoms rasik fó ba, liu hosi apoiu hanesan halo monitorizasaun, halo formasaun, apoiu subsídiu ne’ebé maka tinan-tinan fó, “ Eugenia esplika.

Eugenia mos dehan tan, “Ami haree katak matadalan ida ne’e di’ak teb-tebes, ne’e inisiativa di’ak hosi Asosiasaun Rádiu Komunidade Timor-Leste (ARKTL) no mos apoiu hosi UNESCO, ne’ebé mak matadalan ida ne’e sei gia jornalista sira, oinsá maka sira atu prodús programa sira ne’ebé maka relasiona ho matenek lokal ka matenek tradisional sira. Wanhira ita ko’alia konabá matenek tradisional ne’e úniku teb-tebes, iha kultura ida ne’ebé úniku entre kultura ida ho kultura seluk nomos entre sosiedade ida ho sosiedade seluk.”

Jestor Rádiu Komunidade Atoni Lifau Oekuse, José Francisco Efi esplika sira nia experiensia oinsa sira uza ona mata dalan ne’ebe sira dezenvolve hodi promove matenek tradisional.

“Ha’u hanoin matadalan ida ne’ebé mak ohin ami aprezenta, ida ne’e prodús hosi Asosiasaun Rádiu Komunidade Timor-Leste (ARKTL), ne’ebé maka servisu hamutuk ho Rádiu rua, rádiu Loriku Lian ho rádiu Komunidade Atoni Lifau Oekuse nian, “ Jose haktuir.

Jose hatutan dehan, objetivu hosi matadalan ne’e para atu oinsá bele ajuda kolega rádiu komunidade sira seluk, ne’ebé hakarak prodús programa ruma, en ligadu ho matenek lokal sira ne’ebé maka iha, iha sira nia rai, sira bele utiliza ida ne’e. Ida ne’e hanesan matadalan ida ne’ebé la’os perfeitu, maibé ida ne’e hanesan gia ida oinsá karik sira bele prodús, nia etapa por etapa ne’e sira bele halo tuir. Tanba nia etapa ne’e ami sente katak bele ajuda los ami atu oinsá bele hetan informasaun ne’ebé di’ak atu prodús programa ida. Tanba kuandu ita la iha preparasaun di’ak atu tuun ba komunidade, ita sei la hasoru buat di’ak sira iha komunidade. Tanba sé ita uza sistema hanesan ita halo intervista de’it ba notísia ruma, entaun la preparadu mais ita bele halo, tanba en ligadu ho problema. Mais ida ne’e la iha, ida ne’e programa. Entaun saída mak ita tenki halo maka, ita tenki halo uluk survey. Survey sira ne’ebé mak ita hetan ona katak iha fatin ida ne’e, nia matenek hanesan ne’e, ema ne’ebé nia matenek iha ne’e. Depois sira bele indika, ema ne’ebé maka bele esplika di’ak liu konabá kultura ou matenek sira ne’ebé maka iha. Entaun ida ne’e atu ajuda loos ita atu halo programa ne’e di’ak liután.

Matadalan ida ne’e sira nian rasik, ne’ebé ami iha tiha ona. Ida ne’e hanesan atu ajuda kolega sira seluk iha rádiu seluk, ida ne’e maka ami halo. Matadalan ida ne’e ekipa hosi ARKTL, foti rua hosi Oekuse nian ho Loriku nian hodi halo mix hamutuk atu nune’e bele hetan programa ne’ebé ke di’ak.

Lansamentu ne’e partisipa hosi UNESCO no rádiu komunidade sira.

 

 

LEAVE A REPLY

Please enter your comment!
Please enter your name here