Home Notisia RENETIL Lakon Tan Nia Membru Na’in Rua, PN Fo Votu De Pesar

RENETIL Lakon Tan Nia Membru Na’in Rua, PN Fo Votu De Pesar

205
0
Presidente PN Simu Livro RENETIL hosi SekJen RENETIL (Foto: Parlementu National)

Reportajen Cornelio ‘lakolen’, Ruben ‘hamas’ & Noguera Mendes ‘haksolok’

Organizasaun RENETIL lakon tan membru na’in rua iha fulan marsu nia laran mak hanesan saudozu Helder “Fohorai bo’ot” Pires Piedade no Caetano “Manu Fuik” dos Santos Soares, ne’ebé kontribui maka’as ba luta libertasaun patria hamutuk ho militante no simpatizante RENETIL tomak, ne’ebé hala’o sira nia estudu iha Indonesia hodi tane a’as prinsipiu RENETIL ni’an katak “Antes sem títulu do que sem pária”, nune’e husik hela estudu sira organiza malu hodi hala’o asaun demostrasaun iha Enbaxada Amérika iha Indonesia no iha fatin seluk iha Indonesia, hodi husu Amerika no ONU rekoñese povu Timor Leste nia luta ba ukun rasik a’an, ikus mai mundu rekonese duni Timor Leste nia luta to’o hetan indepedensia iha tinan 2002. Depois de ukun a’an militante RENETIL barak mak lá konsege termina sira nia estudu iha Indonesia tanba partisipa de’it iha manifestasaun sira nune’e halo militante barak maka lá konsege finaliza sira nia estudo no balun konsege termina duni mesmu ho situasan ne’ebé difisil. Depois de Timor Leste restaura tiha ninia indepedensia membru RENETIL barak maka kontinua fila fali sira nia estudu iha rai laran no rai li’ur no barak mós inklina a’an iha partidu polítiku hodi partisipa iha luta libertasaun povu Timor Leste nian hodi kore povu husi ki’ak no mukit.

Iha prosesu dezenvolvimentu nia laran membru RENETIL barak mak partisipa no fo sira nia dedikasaun tomak hodi luta ba libertasaun povu husi ki’ak no mukit, maibé mehi hirak ne’e balun lá konsege realiza tanba Maromak hadomi liu membru hirak ne’e.

Entretantu saudozu Helder “Fohorai bo’ot” Pires Piedade, nia isin mate sei iha hela UK, maibé dadaun ne’e RENETIL esforsu maka’as hodi halo kontaktu ho Enbaxada Timor Leste ba UK ho komunidade timorense iha UK hodi buka dalan atu lori mate isin mai Timor Leste. Hateten aktual Vise Sekretariu Jeral RENETIL, Francisco JMF Belo “Lires”ba Neon Metin iha nia kna’ar fatin Palapasu, Dili, Timor Leste.

Atu rekoñese no valoriza saudozu na’in rua nia dedikasaun ba luta libertasaun patria maka ohin reprezentante povu iha uma fukun parlamentu nasional fó votu pesar ba saudozu na’in rua ho votu afavor 53, kontra 0, abstensaun 0.

Mariano Sabino “Assanami” nu’udar eis Sekretariu jeral RENETIL iha tempu resistensia nia laran, hanesan mós membru parlamentu nasional, ne’ebé partisipa iha Votu Pesar ba saudozu na’in rua iha uma fukun parlamentu nasional fó nia apresiasaun ba membru parlamentu tomak ne’ebé ho laran lu’ak fó votu pesar ba saudozu na’in rua, nu’udar aktu rekoñesimentu ba saudozu na’in rua nia luta ba ukun rasik a’an.

“RENETIL prepara estudante no joven sira hodi kontinua resistensia ba oin, ida ne’e maka missaun inportante RENETIL ni’an iha momentu ne’ebá, membru barak maka kumpri no ka’er metin duni papel RENETIL ni’an ne’ebé hateten, di’ak liu lakon ita nia títulu, duke lakon ita nia patria, ohin membru RENETIL lubuk ida fó sira nia isin lolon ba rai ida ne’e, sira ne’ebé sei moris ohin kumpri nafatin prinsipiu ne’ebé iha hodi serví nafatin rai no povu ida ne’e”.

Assanami mós apela ba militante RENETIL tomak atu kuda sentidu nasionalismu no patriotizmu iha isin lolon no juramentu ne’ebé halo  katak ita laiha rezerva hodi serví nafatin rai ida ne’e “ita labele husu ba rai ida ne’e atu fó ba ita, maibé tenke kumpri nafatin ita nia juramentu, ka’er metin ita nia komitmentu tomak ne’ebé ita nia kompaneru sira husik hela mai ita hamutuk ho veteranus sira ita la’o nafatin ba oin hodi hatutan nafatin missaun ne’ebé sira husik hela mai ita”, hateten Assanami iha, uma fukun Parlamentu Nasional.

Iha sorin seluk deputada Nina Rangel, rekomenda ba Governu Timor Leste atu rezistu saudozu sira nia oan nia naran ba dokumentu espesial ida, nune’e aban bain rua bele fasilita sira nia oan hodi hetan direitu ba eskola no ba fatin hotu-hotu, se la’e ita temi de’it luta na’in, aban bain rua sira atu asesu ba buat sira ne’e laiha, tanba “Juventude sira uluk dehan katak fó hotu, lakon hotu no manan hotu”, ida ne’e lema husi joventude resistensia sira hotu iha tempu uluk hanesan RENETIL, OJETIL, OPJELATIL no sel-seluk tan, lakon hotu, atu manan buat hotu ba ukun rasik a’an. dehan Nina Rangel ba Neon Metin iha uma fukun parlamentu Nasional, 01/04/2019.

 

LEAVE A REPLY

Please enter your comment!
Please enter your name here