Reportajen Joselina dos Santos
Iha kongresu Organizasaun Resistensia Nasional dos Estudantes Timor-Leste (RENETIL) ba da-ualu nian, Joaquim “Russuo” da Fonseca kontinua elitu ba Sekretariu Jeral RENETIL ba da daruak nian, iha períodu tinan 2022-2026 ho votus 199.
Iha Diskursu atuál Sekretariu Jeral RENETIL, Joaquim “Russuo” da Fonseca hatete onra boot ba nia tanba bele hetan tan oportunidade dala idatan, hodi lidera RENETIL no agradese mos ba Prezidente Komisaun Organizadora, ne’ebe servisu ho diak hodi hala’o Kongresu durante loron rua nia laran hodi alkansa programa RENETIL nian diak.
“RENETIL iha kondisaun diak atu kontinua ba oin nune’e durante mandatu tinan 4 nia laran ami sei halo fortalese Sekretariadu estadu sistema balun ne’ebe koko atu instala iha tinan 4 liu ba no balun ne’ebe sei funsiona ami kontinua halo metin, balun ne’ebe la funsiona hasai halo politika ne’ebe diak liu tan atu hametin organizasaun”, Dehan, Sekretariu Jeral Russuo iha Diskursu CCD, 03/12.
Nia Dehan, Sira sei kontinua ho programa atendimentu ba membrus sira hodi rejistu tan baze dadus, tanba hanesan funsaun Ida atu verifika loloos membru sira, no espallla informasaun kona-ba formulariu atu ema bele mai foti hodi prienxe bazeia ba membru RENETIL loloos tanba liu husi verifika dadus ida ne’e atu apoiu diak liu tan membru sira iha situasaun ne’ebe sira presiza apoiu inklui ho situasaun liga asuntu Veteranus nian.
“Revistaliza departamentu ba estratéjikus atu ikus mai SESTIL bele hamriik tanba SESTIL mak sei fó kbiit liu tan ba organizasaun atu bele kontribui no hametin estadu liu husi halo politiku ba politiku estadu nian, tanba RENETIL ko’alia bazeia ba dadus, bazeia ba analiza no bazeia ba peskiza”, nia haktuir.
Iha kongressu Organizasaun Resistensia Nasional dos Estudantes Timor-Leste (RENETIL), ba da-ualu ne’e iha kandidatu Pakote A B no C maka Kandidatu aan ba Sekretariu Jeral RENETIL ba Periodu 2022-2026, maibe iha ikus hodi halo votasaun Kandidatu Pakote A ho total 121 votus, pakote B ho total 199 votus, pakote C ho total 72 no votu branku 2 votu nulu 5.
Nune’e Iha votus ikus ne’e, Pakote B mak sai manan na’in hanesan Joaquim “Russuo” da Fonseca nu’udar Sekretariu Jeral, Metodio Caetano Moniz “Lalatak” nu’udar vise dahluk Sekretariu Jeral no Glenda Inamori nu’udar vise daruak Sekretariu Jeral ba RENETIL periodu 2022-2026 ho total votus 199 .
Alende ne’e mós bainhira remata kontajen votus estrutura aktual Sekretariu Jeral ba Organizasaun Resistensia Nasional dos Estudantes Timor-Leste (RENETIL) ba Periodu 2022-2026, kontinua kedas simu juramentu.
